‘पीएमपी’च्या धडकेत वाघोलीत महिला जखमी

पुणे, ता. १४ : वाघोली स्थानकात पीएमपी बसने पाठीमागून धडक दिल्याने एक महिला गंभीर जखमी झाली. याप्रकरणी चालकाविरुद्ध वाघोली पोलिस ठाण्यात गुन्हा दाखल केला आहे.
विजया दिलीप चव्हाण (वय ४६, रा. उंद्रे वस्ती, थेऊर रस्ता, केसनंद) असे जखमी महिलेचे नाव आहे. चव्हाण या वाघोली बस स्थानकात शनिवारी सायंकाळी पावणेसातच्या सुमारास उभ्या होत्या. त्या वेळी एका बसचालकाने त्यांना पाठीमागून धडक दिली. त्यामुळे त्या गंभीर जखमी झाल्या. त्यांना तातडीने रुग्णालयात दाखल केले. त्यांच्या खांद्याचे हाड व बरगडी फ्रॅक्चर झाल्याचे डॉक्टरांनी सांगितले. चव्हाण यांनी दिलेल्या तक्रारीनुसार बसचालकाविरुद्ध गुन्हा नोंदविला आहे.