बन मस्कामध्ये काच अन् सुपात झुरळ

पुणे, ता. १४ : बन मस्कामध्‍ये काचेचे तुकडे आढळल्याप्रकरणी अन्न व औषध प्रशासनाने (एफडीए) शहरातील प्रसिद्ध हॉटेल ‘गुडलक कॅफे’चा परवाना तात्पुरता निलंबित केला आहे. तपासणीमध्ये स्वच्छताविषयक आढळलेल्या त्रुटींची पुर्तता दूर होईपर्यंत हा परवाना निलंबित राहणार असल्‍याची माहिती ‘एफडीए’ने दिली. तसेच लष्‍कर परिसरातील भिवंडी दरबार हॉटेलमधील सुपामध्ये झुरळ आढळून आले असून त्‍यांच्‍यावरही कारवाई करणार असल्‍याचे ‘एफडीए’ने स्‍पष्‍ट केले.
‘गुडलक कॅफे’मधील बनमध्‍ये काचेचे तुकडे आढळल्‍याप्रकरणी समाजमाध्‍यमावर एक चित्रफीत प्रसारित झाली होती. याबाबत कोणतीही तक्रार ‘एफडीए’कडे दाखल झालेली नाही. मात्र, या चित्रफितीची दखल घेत ‘एफडीए’ने स्‍वतःहून गुडलक कॅफेची तपासणी केली. त्‍यामध्‍ये त्‍यांना येथे स्वच्छताविषयक बाबींमध्‍ये त्रूटी आढळल्‍या. यामध्‍ये फरशी स्‍वच्‍छ नसणे, पाणी साठलेले असणे, कामगारांचे वैद्यकीय प्रमाणपत्र नसणे याबाबी आढळल्‍याने त्‍यांचा परवाना तात्‍पुरता निलंबित केला आहे, अशी माहिती ‘एफडीए’चे सह आयुक्‍त सुरेश अन्‍नपुरे यांनी दिली.
त्‍याचप्रमाणे लष्‍कर परिसरातील महात्मा गांधी रस्त्यावरील ‘भिवंडी दरबार’ या हॉटेलमधील सुपात झुरळ आढळल्‍याप्रकरणी ३१ वर्षीय महिलेने पोलिसांत तक्रार दिली आहे. तक्रारदार या कुटुंबासह जेवणासाठी हॉटेलमध्ये गेल्या असता, त्यांना दिलेल्या सूपामध्ये झुरळ आढळले होते व त्यांनी त्वरित हॉटेल व्यवस्थापक व कर्मचाऱ्यांकडे तक्रार केली. मात्र, व्यवस्थापनाने दुर्लक्ष केल्याने लष्कर पोलिस ठाण्यात हॉटेल मालक व व्यवस्थापनाविरुद्ध गुन्हा दाखल केला होता. तर ‘एफडीए’कडून त्‍यांच्‍यावर कारवाई करण्‍यात येत आहे.

दोन्‍ही प्रकरणांची दखल ‘एफडीए’ने घेतली असून दोन्‍ही हॉटेलची स्‍वच्‍छता व इतर विविध निकषांद्वारे तपासणी केली. तसेच तेथील अन्‍नपदार्थांचे नमुने प्रयोगशाळेत तपासणीला पाठवले आहेत. त्‍याचा अहवाल येणे बाकी आहे. दरम्‍यान, तपासणीमध्‍ये त्रूटी आढळल्‍या आहेत. त्‍यापैकी गुडलक कॅफेचा परवाना तात्पुरत्या स्वरूपात निलंबित केला असून त्‍यांनी त्रुटींची पुर्तता पूर्ण केल्‍यावर तो परवाना पुन्‍हा देण्‍यात येईल. ‘भिवंडी दरबार’बाबतही कारवाई प्रस्‍तावित आहे.
- सुरेश अन्नपुरे,
सह आयुक्त, अन्न व औषध प्रशासन (अन्‍न विभाग)