वाडामध्ये होणार दुसरी समूह शाळा जिल्हा परिषदेचा उपक्रम ः सात शाळांच्या एकत्रीकरणास मंजुरी

पुणे, ता. १४ ः पानशेतमध्ये समूह शाळेचा प्रकल्प यशस्वी ठरल्यानंतर आता खेड तालुक्यातील वाडा गावामध्ये दुसरी समूह शाळा (क्लस्टर स्कूल) करण्यास जिल्हा परिषदेने मंजुरी दिली आहे.
पानशेत येथे राबविण्यात आलेल्या प्रायोगिक तत्त्वावर राबविलेल्या प्रकल्पाची आता इतर ठिकाणीही अंमलबजावणी करण्यास सुरवात झाली आहे. कमी पटसंख्या असलेल्या शाळांना एकत्रित केल्याने विद्यार्थ्यांच्या गुणवत्तेत वाढ झाली. त्यामुळे वाडा गावात ही त्याच धर्तीवर समूह शाळा सुरू होणार आहे.
ग्रामीण भागातील कमी पटसंख्या असलेल्या शाळांना एकत्र करून विद्यार्थ्यांना दर्जेदार आणि प्रभावी शिक्षण मिळावे, या उद्देशाने पुणे जिल्हा परिषदेकडून हा उपक्रम सुरू करण्यात आला आहे. वाडा गावातील सात वाड्यांमधील मुलांना एकत्र आणून समूह शाळा असणार आहे. याबाबत, जिल्हा परिषदेचे मुख्य कार्यकारी अधिकारी गजानन पाटील म्हणाले, ‘‘सात वाड्यांमध्ये एकूण १२८ विद्यार्थी शिक्षण घेत आहेत. हे सर्व विद्यार्थी आता एकाच शाळेत शिक्षण घेतील. त्यामध्ये पहिली ते चौथीपर्यंतचे वर्गांचा समावेश आहे. शाळा व्यवस्थापन समिती, पालक यांच्‍या सहकार्यातून जिल्हा परिषदेने समूह शाळा सुरू करण्यासाठी पुढाकार घेतला. जिल्‍ह्यात पानशेतनंतर आता वाडा गाव येथील दुसरी समूह शाळा असणार आहे.’’

दरम्यान, पानशेत येथील समूह शाळेमुळे विद्यार्थ्यांना एकत्रितपणे उत्तम शिक्षण, आधुनिक सुविधा, प्रशिक्षित शिक्षक आणि वैविध्यपूर्ण शिक्षण मिळत आहे. त्यामुळे या शाळेचा दर्जा उंचावला गेला. या अनुभवाच्या आधारे जिल्हा परिषदेकडून वाडा गाव येथेही अशाच स्वरूपाची शाळा सुरू करण्याचा निर्णय घेतला. शालेय व्यवस्थापन समितीच्या बैठकीमध्ये ठराव करून, तो जिल्हा परिषदेला पाठविण्यात आला होता. त्यानंतर जिल्हा परिषदेने समूह शाळा करण्यास मंजुरी दिली असल्याचे प्रशासनाकडून सांगितले.

वाडा येथील सद्दस्थिती ः
एकूण विद्यार्थी - १२८
एकत्रित केलेल्या शाळा - ७
वर्ग - इयत्ता पहिली ते चौथी

विद्यार्थ्यांसाठी स्कूल बस
वाडा गाव येथे सुरु करण्यात येत असलेल्‍या समूह शाळेमध्ये विद्यार्थ्यांची ने-आण करण्यासाठी वाहतुकीची व्‍यवस्‍था करण्यात आली आहे. जिल्हा परिषदेला एका कंपनीच्या औद्योगिक क्षेत्रातील सामाजिक जबाबदारीच्या (सीएसआर) माध्यमातून स्कूल बस उपलब्ध करून दिली आहे. त्यामुळे विद्यार्थ्यांना शाळेत पोहोचण्याची चिंता मिटली आहे.

‘‘वाडा गावातील वस्त्यांवर असलेल्या काही शाळांमध्ये विद्यार्थ्यांची संख्या कमी होती. एकाच ठिकाणी शिक्षण घेतल्याने शिक्षकांची उपलब्धता वाढण्यास मदत होईल. त्याचबरोबर विद्यार्थ्यांच्या गुणवत्तेकडे अधिक चांगल्या प्रकार लक्ष देणे सुलभ होणार आहे. विद्यार्थ्यांच्या शैक्षणिक गुणवत्तेसह सर्वांगीण विकासावर भर देण्यात येणार आहे. त्यामुळे वाडा येथील समूह शाळेला मंजुरी दिली आहे.
- गजानन पाटील, मुख्य कार्यकारी अधिकारी, जिल्हा परिषद