पुणे विद्यापीठाचा ईपी रॉकसोबत करार

पुणे, ता. १४ : सावित्रीबाई फुले पुणे विद्यापीठाने ईपी रॉक लिमिटेड या कंपनीसमवेत नुकताच सामंजस्य करार केला आहे. या करारामुळे विद्यापीठाच्या नाशिक उपकेंद्रातील विजेचा प्रश्न कायमस्वरूपी सुटण्यास मदत होणार आहे. याद्वारे विद्यापीठाचे हे उपकेंद्र विजेच्या बाबतीत स्वयंपूर्ण होण्याच्या दिशेने वाटचाल करणार आहे.
ईपी रॉक ही कंपनी जगभरामध्ये खाणकाम उद्योगांमध्ये अग्रगण्य कंपनी म्हणून कामकाज करत आहे. कंपनीतर्फे औद्योगिक क्षेत्राची सामाजिक जबाबदारी (सीएसआर) याद्वारे विद्यापीठाच्या नाशिक येथील उपकेंद्रासाठी १२५ केव्हीएच्या सौरऊर्जा प्रकल्पासाठी ७५ लाख रुपयांचा निधी उपलब्ध केला आहे. हा सौरऊर्जा प्रकल्प ऑगस्ट २०२५ मध्ये उपकेंद्रात कार्यान्वित करण्याचे नियोजन आहे. विद्यापीठाचे कुलगुरू डॉ. सुरेश गोसावी, कंपनीचे व्यवस्थापक आशिष जैन, धनराज पुरी यांनी सामंजस्य करारावर स्वाक्षरी केली आहे. यावेळी विद्यापीठाच्या प्रभारी कुलसचिव डॉ. ज्योती भाकरे, व्यवस्थापन परिषद सदस्य सागर वैद्य, विद्यापीठाचे नवोपक्रम, नवसंशोधन व साहचर्य विभागाचे संचालक डॉ. देविदास गोल्हार, नाशिक उपकेंद्राचे सहायक कुलसचिव श्रीपाद बुरकुले आदी उपस्थित होते.