‘आरोग्य एटीएम’द्वारे करा १५ मिनिटांत ६५ तपासण्‍या

पुणे, ता. १४ : तळागाळातील नागरिकांसह सर्वांनाच प्रतिबंधात्‍मक आरोग्‍य चाचण्‍या करता याव्‍यात व त्‍यानुसार त्‍यांना पुढील उपचारांची दिशा ठरवता यावी या उद्देशाने पुण्यातील अभय व मनश्री अगरवाल या दाम्पत्याने ‘क्लिनिक्स ऑन क्लाऊड’ ही वैद्यकीय तपासण्‍या करणारी प्रणाली विकसित केली आहे. याबाबतची माहिती ‘क्लिनिक्स ऑन क्लाऊड’चे संस्थापक व मुख्य कार्यकारी अधिकारी अभय अगरवाल यांनी पत्रकार परिषदेत दिली. यावेळी, सहसंस्थापिका मनश्री अगरवाल, वितरण व्यवस्था पाहणारे अजय ढुमणे उपस्थित होते.
या प्रणालीला ‘आरोग्य एटीएम’ असेदेखील संबोधण्‍यात येत असून त्‍यामध्‍ये अवघ्या दहा ते पंधरा मिनिटांमध्‍ये कृत्रिम बुद्धिमत्तेच्‍या मदतीने तब्बल ६५ हून अधिक आरोग्य चाचण्या करते. त्याचे अहवालदेखील लागेच उपलब्ध होत असल्याने या आरोग्य एटीएमद्वारे ग्रामीण भागात टेलिमेडिसीन अधिक प्रभावीपणे वापरणे शक्य होणार आहे. प्रयोगशाळेत ज्या चाचण्या करण्यासाठी रुग्णांना साडेतीन ते चार हजार रुपये इतका खर्च येतो त्याच चाचण्या या एटीएमद्वारे पाचशे ते दीड हजार रुपयांत करता येणार आहे. यामध्ये १९ प्राथमिक चाचण्यांसह हृदयरोग, मधुमेह, रक्तदाब, हिमोग्लोबिन, एचबीएवनसी, मानसिक आरोग्य, डोळे आदींची तपासणी होते.