अल्पवयीन मुलीवर अत्याचार; दहा वर्षे सक्तमजुरी

पुणे, ता. १४ ः लग्नाचे आमिष दाखवून अल्पवयीन मुलीला पळवून नेत तिच्यावर अत्याचार करणाऱ्यास न्यायालयाने दहा वर्षे सक्तमजुरी व ५०० रुपये दंडाची शिक्षा सुनावली. सत्र न्यायाधीश पी. आर. चौधरी यांनी हा निकाल दिला.
विजय पंढरीनाथ जाधव (वय ३८, वर्षे मूळ रा. पुसद, काकडदाती, गोविंदनगर, यवतमाळ) असे शिक्षा झालेल्या आरोपीचे नाव आहे. याबाबत मुलीच्या आईने पौड पोलिस ठाण्यात फिर्याद दिली होती. फिर्यादी या घरकाम करतात. त्यांनी कामावर जाताना मुलीला बहिणीकडे सोडले होते. संध्याकाळी उशिरा मुलगी घरी न परतल्याने फिर्यादी यांनी अज्ञात व्यक्तीने मुलीला पळवून नेल्याची तक्रार दिली. ही घटना आठ ते नऊ मार्च २०२० दरम्यान घडली होती. त्यावेळी मुलीचे वय १२ वर्षे होते. पोलिसांनी मुलीचा शोध घेतल्यावर त्यांना मुलगी सापडली. त्यावेळी मुलीने सांगितले की जाधव याने ‘माझे तुझ्यावर प्रेम आहे’ असे म्हणत लग्नाचे आमिष दाखवून पळवून नेले. त्यानंतर त्याने एका शेतात तिच्यावर अत्याचार केला. मुलीने दिलेल्या माहितीनंतर पोलिसांनी आरोपीला अटक केली.
या खटल्याचे कामकाज सरकारी वकील पुष्कर सप्रे यांनी पाहिले. गुन्‍ह्याचा तपास पोलिस निरीक्षक आर. जी. दुधभाते, पुणे ग्रामीणचे वरिष्ठ पोलिस निरीक्षक संतोष गिरीगोसावी यांनी केला. न्यायालयीन कामकाजात पोलिस कर्मचारी अल्ताफ हवालदार, अकबर शेख, सत्र न्यायालयाचे पैरवी अंमलदार पोलिस उपनिरीक्षक विद्याधर निचित आणि पोलिस निरीक्षक संतोष घोळवे यांनी मदत केली. दंड न भरल्यास तीन महिने कारावास भोगावा लागेल, असे निकालात नमूद आहे.