पादचारी पुलाचे केवळ खांबच उभे

पुणे, ता. १५ : राष्ट्रीय महामार्ग प्राधिकरणाच्या वतीने चांदणी चौकात सुरू असलेले पादचारी पुलाचे काम डिसेंबर २०२४ अखेर पूर्ण होणे अपेक्षित होते. मात्र, सात महिने उलटून ही काम अद्याप सुरूच आहे. मागील काही महिन्यांत केवळ पुलाच्या खांबाचे काम पूर्ण झाले आहे. मुख्य पुलाच्या कामाला अद्याप सुरुवातदेखील झालेली नाही. या रस्त्यावर पादचारी जीव मुठीत घेऊन रस्ता ओलांडत आहेत. एखादा अपघात घडल्यानंतरच राष्ट्रीय महामार्ग प्राधिकरणाला जाग येणार आहे का? असा प्रश्न पादचाऱ्यांकडून उपस्थित करण्यात येत आहे.

राष्ट्रीय महामार्ग प्राधिकरणाने पुलाच्या कामाचे कंत्राट ‘एमडी इन्फ्रा’ या कंपनीला दिले आहे. सात महिन्यांपेक्षा जास्त कालावधीत याठिकाणी केवळ खांब उभारण्याचे काम झाले. १२५ मीटर लांब व ६.६ मीटर रुंद पादचारी पुलासाठी सुमारे सात कोटी रुपयांचा खर्च अपेक्षित आहे. हा पूल पाषाण ते मुंबईच्या दिशेने असलेल्या बसथांबा दरम्यान बांधला जाणार आहे. पुलाच्या स्ट्रक्चरचे काम मात्र अद्याप सुरूदेखील झालेले नाही. चांदणी चौकातून दररोज हजारो नागरिक रस्ता ओलांडून दुसऱ्या बाजूला जातात. या रस्त्यावरून धावणाऱ्या वाहनांची संख्या मोठी आहे. सुदैवाने रस्ता ओलांडताना अद्याप एकही अपघात झालेला नाही, मात्र पुलाच्या कामाला उशीर होणे नागरिकांच्या सुरक्षेच्या दृष्टीने योग्य नाही. मार्च २०२५ मध्ये हा पूल नागरिकांसाठी खुला होणार असल्याचे आश्वासन राष्ट्रीय महामार्ग प्राधिकरणाने दिले होते. मात्र अजूनही काम पूर्ण होण्यास किमान चार महिन्यांचा कालावधी लागण्याची शक्यता व्यक्त करण्यात आली आहे.

काही अडचणींमुळे कामास विलंब झाला आहे. काम वेगाने पूर्ण करण्याचे संबंधित कंपनीला सांगण्यात आले आहे. पुलाचे काम प्रगतिपथावर आहे.
- संजय कदम, प्रकल्प संचालक, राष्ट्रीय महामार्ग प्राधिकरण, पुणे

पादचारी पुलाचे काम करीत असताना काही अडचणी आल्या आहेत. विशेषतः पुलाच्या पायऱ्यांसंदर्भात अडचण आली असून त्यावर तोडगा काढण्याचे काम सुरू आहे. दरम्यान, आम्ही फॅब्रिकेशनचे काम केले आहे. पूल पूर्ण होण्यास किमान चार महिन्यांचा कालावधी लागणार आहे.
- अमोल भुरे, प्रकल्प व्यवस्थापक, एमडी इन्फ्रा, पुणे