देशी गोवंशाच्या संवर्धनाने ग्रामीण अर्थव्यवस्थेला आधार

पुणे, ता. १५ : ‘‘देशी गोवंशाच्या संरक्षण, संवर्धन व प्रचारासाठी व्यापक जनजागृती आवश्यक आहे. देशी गोवंशाचे संवर्धन म्हणजे ग्रामीण अर्थव्यवस्थेला आधार देणारे एक प्रभावी पाऊल आहे,’’ असे प्रतिपादन राज्याचे सहकारमंत्री बाबासाहेब पाटील यांनी व्यक्त केले.
महात्मा फुले कृषी विद्यापीठाने कृषी महाविद्यालयात सोमवारी आयोजित केलेल्या ‘देशी गोवंश जतन व संवर्धन सप्ताह’ कार्यक्रमाच्या उद्‍घाटनप्रसंगी ते बोलत होते. या वेळी कृषिमंत्री माणिकराव कोकाटे, गोसेवा आयोगाचे अध्यक्ष शेखर मुंदडा, महाराष्ट्र राज्य कृषी शिक्षण उपाध्यक्ष तुषार पवार, महात्मा फुले कृषी विद्यापीठाचे कुलगुरू शरद गडाख, कृषी आयुक्त सूरज मांढरे, महाराष्ट्र राज्य कृषी शिक्षण महासंचालक वर्षा लड्डा, सहयोगी अधिष्ठाता महानंद माने, प्रमुख शास्त्रज्ञ सोमनाथ माने आदी उपस्थित होते.
पाटील म्हणाले, ‘‘भारतातील पारंपरिक गोवंश हे केवळ दुग्धोत्पादनासाठी नसून, जैविक शेतीसाठी आवश्यक असणारे शेणखत, गोमूत्र तसेच अन्य कृषीपयोगी घटक उपलब्ध करून देतात. या उपक्रमाचे उद्दिष्ट देशी गोवंशाचे संरक्षण, संवर्धन व प्रचारासाठी व्यापक जनजागृती करणे हे असून, शाश्वत शेती, पर्यावरण संरक्षण, दुग्धव्यवसायाची उन्नती आणि ग्रामीण अर्थव्यवस्थेला चालना देणे हा यामागचा मुख्य हेतू होता. आजच्या तंत्रज्ञानाच्या युगात देशी गोवंशाच्या वैज्ञानिक व्यवस्थापनाची आवश्यकता अधिक वाढली आहे.’’
कोकाटे म्हणाले, ‘‘सरकारने शेतीसाठी वेगळे धोरण निर्माण केले असून, दुधाचा शेतकऱ्यांना भरीव फायदा होणार आहे. दुग्धजन्य पदार्थांसाठीसुद्धा अनुदानाची गरज आहे. शेतीसाठी शासनाकडून शेतकऱ्यांना भरीव अनुदान देण्यात येणार असून, शेतकऱ्यांनी शाश्वत व सेंद्रिय शेतीकडे लक्ष देणे गरजेचे आहे.’’