सुरक्षारक्षकांचे वेतनासाठी महापालिकेसमोर आंदोलन

पुणे, ता. १५ : महापालिकेतील सुरक्षारक्षक कर्मचाऱ्यांचे वेतन थकविल्याने राष्ट्रीय मजदूर संघटनेने ठिय्या आंदोलन केले. याची दखल घेत महापालिका प्रशासनाने संबंधित कर्मचाऱ्यांचे प्रश्‍न सोडविण्याचे आश्‍वासन दिले.
राष्ट्रीय मजदूर संघटनेचे अध्यक्ष व कामगार नेते सुनील शिंदे यांच्या नेतृत्वाखाली महापालिकेसमोर आंदोलन करण्यात आले. यावेळी संघटनेचे उपाध्यक्ष सीताराम चव्हाण, सरचिटणीस एस. के. पळसे, सुरक्षा प्रतिनिधी विजय पांडव, उज्वल साने, गुरुनाथ बिराजदार, अरविंद आगम, जान्हवी दिघे, सचिन घोरपडे, प्रकाश इंदोरीकर, दीपाली कांबळे उपस्थित होते. संबंधित कामगारांचे वेतन दोन महिन्यांपासून कंपनीने दिले नाही. वेतन मिळत नाही, तोपर्यंत सर्व कामगार आयुक्तांच्या कार्यालयातच बसून राहतील, असा निर्धार आंदोलनकर्त्यांनी केला.
शिंदे यांच्यासह सुरक्षारक्षकांनी अतिरिक्त आयुक्त ओमप्रकाश दिवटे यांची भेट घेऊन त्यांना निवेदन दिले. संबंधित कामगारांचे महापालिका आयुक्त यांच्या कार्यालयात बैठक घेऊन प्रश्‍न मार्गी लावले जातील, असे आश्‍वासन देण्यात दिले. दरम्यान, महापालिकेचे कामगार अधिकारी नितीन केंजळे यांनी एका कंपनीच्या व्यवस्थापनाशी संपर्क साधत सुरक्षारक्षकांचे वेतन तत्काळ देण्यास सांगितले. त्यानुसार, मे महिन्याचे वेतन तत्काळ जमा करण्यात आले तर जून महिन्याचे वेतन काही दिवसांतच जमा करणार असल्याचे कंपनीने सांगितले. जून महिन्याचे वेतन वेळेत न झाल्यास पुन्हा एकदा आंदोलन करण्याचा इशारा शिंदे यांनी दिला.