युवा धोरणाचा प्रारूप आराखडा मुख्यमंत्र्यांना सादर

पुणे, ता. १५ ः नव्या आव्हानांना सामोरे जाण्यासाठी तयार करण्यात येत असलेल्या राज्य युवा धोरणाचा प्रारूप आराखडा मुख्यमंत्री देवेंद्र फडणवीस यांना मुंबईत नुकताच सादर करण्यात आला.
शाळा, महाविद्यालये, सोशल मीडिया आणि सेवा क्षेत्रातील प्रतिनिधींनाही धोरणात सहभागी करून त्यांच्या सूचना समाविष्ट करण्याचा आदेश फडणवीस यांनी या वेळी दिला.
राज्याच्या सुधारित युवा धोरणासाठी विधानभवन येथे समितीची बैठक झाली. त्यास फडणवीस यांच्यासह उपमुख्यमंत्री अजित पवार, क्रीडा व युवक कल्याण मंत्री आणि समितीचे अध्यक्ष दत्तात्रेय भरणे, आमदार अमोल मिटकरी, श्रीकांत भारतीय, संतोष दानवे, राजेश पवार, आशुतोष काळे, प्रवीण दटके, देवेंद्र कोठे, सुहास कांदे, डॉ. बाबासाहेब देशमुख, प्रकाश सुर्वे, वरुण सरदेसाई, रोहित पाटील, राष्ट्रीय युवा पुरस्कार सन्मानार्थी प्रा. डॉ. मिलिंद भोई, डॉ. शंतनू जगदाळे, प्रवीण निकम, तपस्वी गोंधळी, मनीष गवई, विशेष निमंत्रित सदस्य डॉ. निवेदिता एकबोटे, युवा बिरादरीचे संस्थापक पद्मश्री क्रांती शाह, क्रीडा व युवक कल्याण आयुक्त शीतल तेली आदी उपस्थित होते.
मुख्यमंत्री फडणवीस म्हणाले की, युवकांचे विचार, त्यांच्या अपेक्षा समजून घेत धोरण आखले गेले तर ते समर्पक ठरेल. शहरी व ग्रामीण भागातील युवकांना समान संधी मिळावी यासाठी प्रशिक्षण, सुविधा आणि योजनांचा समावेश असलेले समतोल धोरण तयार करणे आवश्यक आहे. युवक कल्याण विभागाबरोबरच अन्य विभागांनीही हे उद्दिष्ट पूर्ण करण्यासाठी समन्वयाने काम करणे गरजेचे आहे. बैठकीत आमदार आणि निमंत्रित सदस्यांनीही युवा धोरणासाठी सूचना मांडल्या. या समितीतील सदस्य डॉ. भोई, डॉ. जगदाळे, निकम यांनी युवा धोरणामध्ये आवश्यक असलेल्या गोष्टींचा कच्चा मसुदा यावेळी फडणवीस यांना सादर केला.