‘ब्लेड्स ऑफ ग्लोरी’ आता इंदूरमध्येही

पुणे, ता. १५ ः शहरातील ‘ब्लेड्स ऑफ ग्लोरी क्रिकेट संग्रहालय’ व मध्य प्रदेश क्रिकेट असोसिएशन (एमपीसीए) यांनी एकत्र येत इंदूरच्या होळकर क्रिकेट स्टेडियममध्ये ‘ब्लेड्स ऑफ ग्लोरी’ क्रिकेट संग्रहालयाची शाखा सुरू केली. मोठमोठ्या क्रिकेटपटूंनी विविध सामन्यांमध्ये वापरलेल्या क्रिकेटच्या वस्तूंचा संग्रह असलेल्या या संग्रहालयाचे औपचारिक उद्‍घाटन केंद्रीय दूरसंचारमंत्री व देशाच्या पूर्वोत्तर क्षेत्राचे विकासमंत्री ज्योतिरादित्य शिंदे यांच्या हस्ते नुकतेच झाले.
याप्रसंगी आयोजित कार्यक्रमास भारतीय क्रिकेट संघाचे माजी कर्णधार दिलीप वेंगसरकर, मध्य प्रदेश क्रिकेट असोसिएशनचे अध्यक्ष अभिलाष खांडेकर आणि ब्लेड्स ऑफ ग्लोरी क्रिकेट संग्रहालयाचे संस्थापक रोहन पाटे उपस्थित होते. या दरम्यान करण्यात आलेल्या सामंजस्य करारानुसार पुढील पाच वर्षे ब्लेड्स ऑफ ग्लोरी हे इंदूरच्या होळकर क्रिकेट स्टेडियममध्ये आपला संग्रह प्रदर्शित करेल. प्रदर्शनातील संग्रह हा दर सहा महिन्यांनी बदलला जाईल, अशी माहिती पाटे यांनी दिली. या संग्रहालयात प्रख्यात क्रिकेटपटूंनी वापरलेल्या ५०० क्रिकेटच्या वस्तूंचा समावेश असून, यापैकी ४०० वस्तू या ब्लेड्स ऑफ ग्लोरीने उपलब्ध करून दिल्या आहेत, असेही त्यांनी नमूद केले.