ऊसतोड कामगार कायद्याची प्रक्रिया गतीने पूर्ण करा : डॉ. नीलम गोऱ्हे

पुणे, ता. १५ : ऊसतोड कामगारांसाठी स्वतंत्र कायदा तयार करून तो लवकर लागू करण्यासाठी सहकार विभागाने कार्यवाही करावी. जेणेकरून विधेयक डिसेंबर अधिवेशनापूर्वीच अंतिम करून जनतेच्या सूचनांसाठी प्रसिद्ध करण्याच्या अनुषंगाने कार्यवाही करावी, असे मत उपसभापती डॉ. नीलम गोऱ्हे यांनी व्यक्त केले.
विधानभवनात ऊसतोड कामगारांच्या व महिला कामगारांच्या आरोग्य, सुरक्षाव्यवस्था आणि सामाजिक संरक्षणाच्या समस्या तातडीने मार्गी लावाव्यात यासाठी बैठक आयोजित करण्यात आली होती. या वेळी सहकार मंत्री बाबासाहेब पाटील, आमदार सदाभाऊ खोत, प्रा. डॉ. मनीषा कायंदे, सहकार विभागाचे प्रधान सचिव प्रवीण दराडे, साखर आयुक्त सिद्धराम सालीमठ आदी उपस्थित होते.
डॉ. गोऱ्हे म्हणाल्या, ‘‘ऊसतोड कायदा तयार करताना कामगारांचा विचार अधिक करण्यात यावा. ऊसतोड कामगारांसाठी प्रत्येक कारखान्यावर आरोग्य तपासणीसाठी रुग्णालय सुरू करण्यात यावे. महिला कामगारांसाठी स्त्रीरोगतज्ज्ञाची नेमणूक करण्यात यावी, तसेच प्रधानमंत्री जन आरोग्य योजनेत सर्व ऊसतोड कामगारांची नोंदणी करावी. महिला ऊसतोड कामगारांचा लाडक्या बहिणी योजनेत शंभर टक्के सहभाग करून घेण्यासाठी सर्वेक्षण करण्यात यावे.’’
ऊसतोड महामंडळाच्या पोर्टलवर स्त्री-पुरुष कामगारांची स्वतंत्र माहिती द्यावी. ऊसतोड कामगार महामंडळाने मॅटर्निटी बेनिफिट फंडाच्या माध्यमातून ऊसतोड महिला कामगारांना प्रसूती रजा कालावधीत किमान वेतन देण्याबाबत कार्यवाही करावी, तसेच कामाच्या ठिकाणी स्वच्छता गृह, सॅनिटरी पॅड उपलब्ध करून घ्यावे, असेही त्यांनी सांगितले.