औंधमध्ये दहशत माजविणाऱ्या अमीर शेख टोळीवर ‘मकोका’ कारवाई

पुणे, ता. १६ : औंधमधील विधाते वस्ती परिसरात दहशत माजवीत गुंड टोळक्याने दोघांवर हत्यारांनी प्राणघातक हल्ला केल्याची घटना नुकतीच घडली. या टोळीतील सराईत गुन्हेगार अमीर अल्लाउद्दीन शेख आणि त्याच्या साथीदारांवर महाराष्ट्र संघटित गुन्हेगारी नियंत्रण (मकोका) कायद्यान्वये कारवाई करण्यात आली.
फिर्यादी आणि त्यांचे मित्र सनराईज अपार्टमेंटजवळ २८ जून रोजी पहाटेच्या सुमारास गप्पा मारत होते. त्याचवेळी १४ ते १५ जणांच्या टोळक्याने लाकडी दांडके आणि हत्यारे घेऊन अचानक हल्ला चढवला. हत्यारे हवेत फिरवत फिर्यादीच्या डोक्यावर आणि हातावर हत्याराने वार करून गंभीर जखमी केले. याप्रकरणी चतुःशृंगी पोलिस ठाण्यात गुन्हा दाखल करण्यात आला होता. या प्रकरणात पोलिस आयुक्त अमितेश कुमार, पोलिस सहआयुक्त रंजनकुमार शर्मा यांनी आरोपींवर कठोर कारवाईचे आदेश दिले. त्यानुसार परिमंडळ चारचे पोलिस उपायुक्त सोमय मुंडे, सहाय्यक आयुक्त विठ्ठल दबडे, वरिष्ठ पोलिस निरीक्षक उल्हास कदम यांच्या मार्गदर्शनाखाली पोलिस निरीक्षक (गुन्हे) अश्विनी ननवरे, तपासी अधिकारी सहाय्यक निरीक्षक सचिन करांडे, नरेंद्र पाटील यांनी गुन्ह्याचा तपास केला. आरोपी अमीर अल्लाउद्दीन शेख आणि त्याच्या टोळीविरोधात ‘मकोका’अंतर्गत कारवाईचा प्रस्ताव सादर करण्यात आला. या प्रस्तावास अतिरिक्त पोलिस आयुक्त मनोज पाटील यांनी १५ जुलै रोजी मंजुरी दिली. त्यानुसार या टोळीवर ‘मकोका’ कायद्यान्वये कारवाई करण्यात आली. पुढील तपास सहाय्यक आयुक्त विठ्ठल दबडे यांच्या मार्गदर्शनाखाली करण्यात येत आहे.