पुणे विद्यार्थी गृहाच्या महाविद्यालयाचा वर्धापन दिन उत्साहात

पुणे, ता. १६ ः पुणे विद्यार्थी गृहाच्या सहकारनगर येथील विज्ञान व वाणिज्य महाविद्यालयाचा २४ वा वर्धापन दिन नुकताच उत्साहात झाला. याप्रसंगी कृत्रिम बुद्धिमत्ता क्षेत्रातील तज्ज्ञ डॉ. अमेय पांगारकर, संस्थेचे उपाध्यक्ष सुभाष जिर्गे, संचालक आनंद कुलकर्णी, सुनील रेडेकर, प्रा. राजेंद्र कडुसकर, रमेश कुलकर्णी, खजिनदार कृष्णाजी कुलकर्णी, महाविद्यालयाचे प्रमुख प्रा. डॉ. राजेंद्र कांबळे, प्राचार्य डॉ. संजयकुमार गायकवाड, उपप्राचार्य रेखा जोशी आदी उपस्थित होते. याप्रसंगी डॉ. पांगारकर यांनी विद्यार्थ्यांच्या जीवनातील कृत्रिम बुद्धिमत्तेच्या भूमिकेबाबत आपले विचार मांडले. बदलत्या शैक्षणिक प्रणालीमध्ये शिक्षकांची भूमिका अधिक व्यापक होत असून विद्यार्थ्यांना योग्य दिशा दाखविण्याची जबाबदारी शिक्षकांची असल्याचे त्यांनी सांगितले. प्राचार्य डॉ. गायकवाड यांनी महाविद्यालयाच्या आगामी रौप्यमहोत्सवी वर्षाचे नियोजन मांडले. सूत्रसंचालन स्नेहल जाधव यांनी केले. डॉ. स्वाती जोशी यांनी आभार मानले.