पुरंदर विमानतळासंदर्भात आज मुख्यमंत्र्यांसमवेत बैठक

पुणे, ता. १६ : पुरंदर येथील प्रस्तावित विमानतळाबाबत मुख्यमंत्री देवेंद्र फडणवीस यांच्या अध्यक्षतेखाली गुरुवारी (ता. १७) महत्त्वपूर्ण बैठक होणार आहे. या बैठकीत मोबदल्यासह भूसंपादनाबाबत सध्या निर्माण झालेल्या तिढ्यावर मार्ग निघण्याची शक्यता व्यक्त केली जात आहे.
पुरंदर विमानतळासाठी करण्यात येणाऱ्या भूसंपादनाबाबत सात गावांमधील शेतकऱ्यांकडून जिल्हा प्रशासनाच्या वतीने हरकती, सूचना मागविण्यात आल्या होत्या. या हरकतींवरील सुनावणी पूर्ण झाली असून, काही शेतकऱ्यांनी विमानतळाला आपला विरोध कायम ठेवला आहे, तर काही शेतकऱ्यांनी भूसंपादनाच्या मोबदल्याचे पॅकेज जाहीर करण्याची मागणी केली आहे.
या पार्श्‍वभूमीवर मुख्यमंत्र्यांच्या अध्यक्षतेखाली बुधवारी ही महत्त्वपूर्ण बैठक होत आहे. त्यास जिल्हा प्रशासनाकडून दुजोरा देण्यात आला. दरम्यान, या बैठकीत भूसंपादनाच्या मोबदल्याचे सूत्र (पॅकेज) ठरण्याची शक्यता वर्तविण्यात येत आहे. त्यानंतरच संयुक्त मोजणी आणि प्रत्यक्ष मोबदला किती मिळेल, हे ठरू शकणार आहे. त्यानंतर भूसंपादनास सुरुवात करता येणार आहे.