ट्रेडिंगच्या बहाण्याने ६२ लाखांची फसवणूक

पुणे, ता. १७ : शेअर ट्रेडिंगमधील गुंतवणुकीवर चांगला परतावा देण्याच्या आमिषाने सायबर चोरट्यांनी मुकुंदनगर आणि बिबवेवाडीतील दोघांना तब्बल ६२ लाख रुपयांना गंडा घातल्याचा प्रकार समोर आला आहे.
याप्रकरणी स्वारगेट पोलिस ठाण्यात २९ वर्षीय तरुणाने तक्रार दिली आहे. हा प्रकार एप्रिल ते २२ मे २०२५ या कालावधीत घडला आहे. पोलिसांनी दिलेल्या माहितीनुसार, तक्रारदार हे नोकरदार असून, त्यांना एप्रिल २०२५ मध्ये चोरट्यांनी शेअर ट्रेडिंगमधील गुंतवणुकीतून जादा परतावा देण्याचे आमिष दाखविले. विश्वास मिळविण्यासाठी चोरट्यांनी तरुणाला प्रथम काही परतावा दिला. नंतर मात्र, त्यांच्याकडून वेळोवेळी २५ लाख ३० हजार रुपये गुंतवणूक करण्यास भाग पाडले. परंतु, नंतर त्याला परतावा किंवा मूळ रक्कम न देता फसवणूक केली.
दुसऱ्या घटनेत ७५ वर्षीय ज्येष्ठ नागरिकाला सायबर चोरट्यांनी ३६ लाख ६७ हजार रुपयांना फसविले. त्यांनाही अशाच प्रकारे चोरट्यांनी शेअर ट्रेडिंगमध्ये गुंतवणूक करण्यास भाग पाडले. परंतु, पैसे घेतल्यानंतर त्यांना परतावा किंवा मूळ मुद्दल न देता त्यांची फसवणूक केली. याप्रकरणी भारती विद्यापीठ पोलिसांत गुन्हा नोंद केला आहे. मार्च २०२३ ते डिसेंबर २०२४ या कालावधीत हा प्रकार घडला आहे.