प्रांताप्रांतातील बहुरूपी रामकथा पुस्तकरुपात

पुणे, ता. १७ ः आदिकवी वाल्मीकी रचित रामायण हे सर्वश्रुत आहेच; मात्र त्याव्यतिरिक्त भारताच्या विविध प्रांतांमध्ये, बृहत्तर भारतात आणि आशिया खंडातील अनेक लहान-मोठ्या देशांमध्ये रामकथा विविध रूपात प्रकट झाली. रामकथेची ही नानाविध रूपे आता ‘बहुरूपी रामकथा’ या पुस्तकाच्या निमित्ताने मराठीत प्रथमच संग्रहित करण्यात आल्या आहेत. हे पुस्तक लवकरच प्रकाशित होत आहे.
डॉ. रा. चिं. ढेरे संस्कृती संशोधन केंद्रातर्फे सुमारे दीड वर्षे ‘बहुरूपी रामकथा’ या शीर्षकाच्या व्याख्यानमालेचे आयोजन करण्यात आले होते. या व्याख्यानमालेत अभ्यासक आणि प्राध्यापकांनी देश-विदेशातील रामकथांचा परिचय करून दिला. भारताच्या विविध प्रांतात आणि बृहत्तर भारतात विखुरलेली रामकथा त्यातील साम्य व वैविध्यांसह एकत्रित स्वरूपात पुस्तकाच्या निमित्ताने मराठीत प्रथमच वाचकांसमोर ठेवता यावी, या उद्देशाने या सर्व व्याख्यानांचे दस्ताऐवजीकरण करण्याचा निर्णय केंद्राने घेतला. त्यातून ‘बहुरूपी रामकथा’ हे पुस्तक आकारास आले, अशी माहिती केंद्राच्या सचिव डॉ. वर्षा गजेंद्रगडकर यांनी दिली.

महत्त्वाचे
- पुस्तकाचे संपादन ज्येष्ठ लेखिका-कवयित्री डॉ. अरुणा ढेरे यांनी केले आहे
- पद्मगंधा प्रकाशनातर्फे पुस्तक प्रकाशित
- रामायण आणि वेदवाङ्मय, पुराणग्रंथांमधील रामकथा, संस्कृत काव्यनाटकांमधील रामकथा, अध्यात्म रामायण अशा विविध विषयांवरील लेखांचा समावेश
- डॉ. गौरी माहुलीकर, डॉ. अंजली पर्वते, डॉ. मंजूषा गोखले, डॉ. परिणिता देशपांडे, डॉ. अंबरीष खरे, प्रणव गोखले, डॉ. सुनीला गोंधळेकर, डॉ. माधवी भट, दीपाली पाटवदकर आदी तज्ज्ञांच्या व्याख्यानांवर आधारीत लेखांचा समावेश

सोमवारी पुस्तकाचे प्रकाशन
‘बहुरूपी रामकथा’ या पुस्तकाचे प्रकाशन सोमवारी (ता. २१) सायंकाळी सहा वाजता टिळक रस्त्यावरील न्यू इंग्लिश स्कूलच्या गणेश सभागृहात होणार आहे. यावेळी ‘भारतीय रंगभूमीच्या शोधात’ आणि ‘बोरकरांची प्रेमकविता’ या डॉ. रा. चिं. ढेरे यांच्या दोन पुस्तकांचे पुनर्मुद्रणही प्रकाशित होणार आहे. तसेच, डॉ. रा. चिं. ढेरे यांच्या ‘श्रीविठ्ठल ः एक महासमन्वय’ या ग्रंथावर आधारित अभिवाचन चंद्रकांत काळे, स्वामिनी पंडित व गजानन परांजपे हे सादर करणार आहेत. हा कार्यक्रम सर्वांसाठी खुला आहे.