तत्काळ पासपोर्ट विशेष मोहीम उद्या

पुणे, ता. १७ : पासपोर्ट सेवा अधिक गतिमान व सुलभ करण्याच्या उद्देशाने प्रादेशिक पासपोर्ट कार्यालयातर्फे मुंढवा येथील पासपोर्ट सेवा केंद्रात शनिवारी (ता. १९) तत्काळ पासपोर्ट विशेष मोहीम राबविण्यात येईल.
परराष्ट्र मंत्रालयाच्या उपक्रमांतर्गत नागरिकांना ऑनलाइन अर्ज करता येणार असून, तत्काळ अपॉइंटमेंट उपलब्ध करून दिल्या जातील. अर्ज सादर करताना अर्जदारांनी आधार क्रमांक असलेला क्यूआर कोडयुक्त जन्म दाखला, इयत्ता दहावी उत्तीर्ण प्रमाणपत्र, विद्यमान पासपोर्ट (असल्यास), नवीनतम क्यूआर कोडसह ई-आधार, होलोग्रामसह पॅनकार्ड व मतदार ओळखपत्र, ड्रायव्हिंग लायसन्स, विवाह प्रमाणपत्र आदी आवश्यक मूळ कागदपत्रे केंद्रावर आणणे अनिवार्य आहे, अशी माहिती प्रादेशिक पासपोर्ट कार्यालयाने दिली आहे.
खासगीरीत्या छापलेली स्मार्ट आयडी कार्ड जसे की- आधार, पॅन किंवा मतदार ओळखपत्र अमान्य असतील. अर्ज करण्यापूर्वी तत्काळ सूचना आणि तत्काळ अंडरटेकिंग काळजीपूर्वक वाचणे आवश्यक आहे. तसेच नागरिकांनी ‘डिजीलॉकर’ आणि ‘एमआधार’ अ‍ॅपद्वारे क्यूआर कोडसह कागदपत्रांची सत्यता तपासावी. या मोहिमेचा लाभ घेण्यासाठी इच्छुकांनी वेळेत अपॉइंटमेंट बुक करून सर्व आवश्यक कागदपत्रांसह केंद्रावर उपस्थित राहावे, असे आवाहन कार्यालयाने केले आहे.