आळंदीत उद्यापासून वारकरी कीर्तनकार गोलमेज परिषद

पुणे, ता. १७ ः एमआयटी विश्‍वशांती विद्यापीठाच्या स्कूल ऑफ एज्युकेशन, पुणे आणि ‘एमआयटी- राष्ट्रीय सरपंच संसद’ यांच्यातर्फे शनिवार (ता. १९) आणि रविवारी (ता. २०) आळंदीतील ‘डॉ. विश्‍वनाथ कराड वर्ल्ड पीस स्कूल’ येथे दोनदिवसीय ‘महाराष्ट्र वारकरी कीर्तनकार गोलमेज परिषदे’चे आयोजन करण्यात आले आहे. या परिषदेत राज्यभरातून ६० कीर्तनकार आणि १५० सरपंच सहभागी होणार आहेत.
परिषदेचे प्रमुख समन्वयक योगेश पाटील यांनी गुरुवारी पत्रकार परिषदेत ही माहिती दिली. यावेळी परिषदेच्या सुकाणू समितीचे सदस्य यशोधन महाराज साखरे, एमआयटी विश्‍वशांती विद्यापीठाचे प्र-कुलगुरू डॉ. मिलिंद पांडे, एमआयटी स्कूल ऑफ एज्युकेशनच्या प्रभारी प्राचार्या डॉ. शालिनी टोणपे, राष्ट्रीय सरपंच संसदेचे सह-समन्वयक प्रकाश महाले उपस्थित होते.
‘वारकरी संप्रदायाची २१ व्या शतकातील सामाजिक प्रबोधनाची दिशा, स्वरूप, समस्या व आव्हाने आणि निराकरणाची संभाव्य कृतिशील उपाययोजना’ हा परिषदेचा विषय आहे. परिषदेचे उद्‍घाटन शनिवारी दुपारी तीन वाजता राज्याचे अन्न व औषध प्रशासनमंत्री नरहरी झिरवाळ यांच्या उपस्थितीत होणार आहे. रविवारी सकाळी ९.३० वाजता ‘वारकरी संप्रदायाच्या सामाजिक प्रबोधनाची वाटचाल’ या विषयावरील सत्रात राज्याचे सांस्कृतिक कार्यमंत्री आशिष शेलार उपस्थित राहणार आहेत. उद्‍घाटनानंतर दोन दिवसांत एकूण चार सत्रांत ही परिषद होणार असून, राज्यभरातील कीर्तनकार, शास्त्रज्ञ, सामाजिक कार्यकर्ते आणि सरपंच या परिषदेत विचार मांडतील.