इएसआयसी लाभ देण्याची मागणी

पुणे, ता. १७ : महाराष्ट्रातील हजारो अंगणवाडी सेविका व मदतनीस या महिलांना कामगार राज्य विमा महामंडळांतर्गत मोफत आरोग्य सुविधा, अपघात विमा, मातृत्व लाभ, निवृत्तीनंतरचा सुरक्षा लाभ व अन्य कामगार हक्काचे संरक्षण त्वरित लागू करावे, अशी मागणी राष्ट्रीय मजदूर संघटनेचे अध्यक्ष सुनील शिंदे यांनी राज्य सरकारकडे केली आहे.
या महिला गेल्या कित्येक वर्षांपासून अत्यंत अल्प मानधनावर राज्य सरकारच्या अंगणवाडी केंद्रात कार्यरत असून, त्यांच्याकडे लहान मुलांचे पोषण, महिलांचे आरोग्य आणि विविध केंद्र व राज्य सरकारच्या योजना पोहोचविण्याची जबाबदारी आहे. मात्र, यांना कोणतीही आरोग्य सुविधा किंवा विमा सुरक्षा आजतागायत देण्यात आलेली नाही. राष्ट्रीय मजदूर संघ युनियनने याबाबतचे निवेदन मुख्यमंत्र्यांना दिले आहे. शिंदे म्हणाले, ‘‘सरकारने याकडे त्वरित गांभीर्याने लक्ष देऊन निर्णय घ्यावा आणि अंगणवाडी सेविका व मदतनीस यांना ‘ईएसआयसी’अंतर्गत समावेश करावा.’’