गुंतवणुकीच्या आमिषाने दोन कोटींची फसवणूक

पुणे, ता. १७ ः वैद्यकीय शिक्षण क्षेत्रात गुंतवणूक केल्यास दुप्पट परतावा देण्याच्या आमिषाने दोन कोटी रुपयांची फसवणूक प्रकरणात न्यायालयाने चौघांचा अटकपूर्व जामीन अर्ज फेटाळला. अतिरिक्त सत्र न्यायाधीश ए. एस. वाघमारे यांनी हा आदेश दिला.
चारही आरोपी सरार्इत असून, शिक्षण क्षेत्रात गुंतवणुकीच्या नावाखाली त्यांनी फसवणुकीचे अनेक गुन्हे केले आहेत. त्यांना किर्गिझिस्तान देशात प्रवेशास बंदीही घालण्यात आली आहे, असे सरकारी वकिलांनी न्यायालयाच्या निदर्शनास आणून दिले.
गोपालन अनिष, मनीष कुमार अगरवाल, पराग गर्ग आणि मुकुल जैन अशी जामीन फेटाळलेल्यांची नावे आहेत. याबाबत संतोष सेवू पवार (वय ३७, रा. बावधन बुद्रुक) यांनी बावधन पोलिस ठाण्यात तक्रार दिली आहे. संतोष यांचा जमीन खरेदी-विक्रीचा व्यवसाय आहे. २०१९ मध्ये संतोष यांची एका व्यक्तीच्या माध्यमातून चौघांशी ओळख झाली. चौघे प्रिविन प्रेपरेटिव्ह प्रा.लि. कंपनी नोयडा, उत्तर प्रदेशचे संचालक आहेत. ही कंपनी शिक्षण क्षेत्रात कार्यरत आहे, असे पवार यांना सांगण्यात आले होते. शिक्षण क्षेत्रात गुंतवणूक केल्यास दुप्पट परतावा देण्याचे आमिष दाखवत पवार यांना गुंतवणूक करण्यास भाग पाडले. पवार यांनी जानेवारी २०२२ मध्ये रोख स्वरूपात एक कोटी व ऑनलाइन पद्धतीने एक कोटी रुपये आरोपींना दिले. मात्र, आरोपींनी त्यांना परतावा दिला नाही. तक्रारदारांनी विचारणा केली असता, उडवाउडवीची उत्तरे देण्यात येत होती. त्यामुळे त्यांनी पोलिसांत धाव घेतली.
या गुन्ह्यात चारही आरोपींनी अटकपूर्व जामिनासाठी न्यायालयात अर्ज केला. या अर्जाला सरकारी वकील मारुती वाडेकर आणि तक्रारदारांचे वकील अ‍ॅड. रमेश खेमू राठोड यांनी विरोध केला. हा गंभीर स्वरूपाचा गुन्हा असून, सखोल तपासासाठी चौघांना अटक करणे गरजेचे आहे, अशी मागणी सरकारी वकिलांनी केली.