पर्यटक व्यावसायिकांना नोंदणीचे आवाहन

पुणे, ता. १७ : देश-विदेशातील पर्यटकांच्या निवास व्यवस्थेसाठी टुरिस्ट होम, होम स्टे, पर्यटन व्हिला, पर्यटक अपार्टमेंट या योजनेच्या माध्यमातून व्यवसायाची संधी पर्यटन संचालनालय पुणे विभागामार्फत उपलब्ध करून देण्यात आली आहे. नागरिक तसेच पर्यटक व्यावसायिकांनी नोंदणी करून योजनेचा लाभ घ्यावा, असे आवाहन पुणे विभागाच्या प्रभारी उपसंचालक शमा पवार यांनी पत्रकान्वये केले आहे. या योजनेमुळे देश-विदेशातून महाराष्ट्रात येणाऱ्या पर्यटकांना शहरातील जीवनशैली, संस्कृती आणि परंपरा जवळून अनुभवता येणार आहे. तसेच स्थानिक स्वयंपाक, मराठमोळे पाहुणचार व कुटुंबातील गप्पागोष्टींमुळे पर्यटकांचा प्रवास अधिक संस्मरणीय होईल. अधिक माहितीसाठी संपर्क क्र. ८०८००३५१३४ यावर कार्यालयीन वेळेत संपर्क साधावा, असेही कळविण्यात आले आहे.