वाजपेयी वैद्यकीय महाविद्यालय ‘व्हेंटिलेटर’वर

पुणे, ता. १७ ः पुणे महापालिकेने घाईगडबडीत भारतरत्न अटलबिहारी वाजपेयी वैद्यकीय महाविद्यालय सुरू केले. पण तीन वर्षांनंतर त्याचे गंभीर परिणाम दिसून येत आहेत. राष्ट्रीय वैद्यकीय आयोगाने (एनएमसी) सुधारणेसाठी अखेरच्या चार महिन्यांची मुदत दिली आहे, अन्यथा मान्यता रद्द होणार आहे. त्यामुळे गुरुवारी तातडीने कमला नेहरू रुग्णालयात ४३० खाटांचे रुग्णालय सुरू करण्याचा निर्णय आयुक्त नवलकिशोर राम यांनी घेतला आहे.
पुणे महापालिकेने २०२२ मध्ये मंगळवार पेठेत वैद्यकीय महाविद्यालय सुरू केले. त्यानंतर महाविद्यालय व वसतिगृहाची उभारणी, पदभरती, रुग्णालय सुरू करणे याकडे दुर्लक्ष केले गेले. राष्ट्रीय वैद्यकीय आयोगाने महापालिकेच्या या कामावर ताशेरे ओढून सुधारणा करण्यासाठी नोटीस बजावली. पण प्रशासनाने याकडे दुर्लक्ष केले. त्यानंतर वर्षभराने दुसरी नोटीस महापालिकेला बजावून मान्यता रद्द का करू नये, असे असा प्रश्‍न विचारला आहे. दरम्यान, आयुक्त नवलकिशोर राम यांनी सुधारणा करण्यासाठी चार बैठका घेतल्या. पुढील चार महिने हे महत्त्वाचे असल्याचे त्यांनी सांगितले.
पत्रकारांशी बोलताना नवलकिशोर राम म्हणाले, ‘‘वैद्यकीय महाविद्यालय सुरू करताना व्यवस्थित नियोजन न केल्याने ही परिस्थिती निर्माण झाली आहे. वैद्यकीय महाविद्यालय आणि रुग्णालयाच्या इमारतीचे काम पूर्ण होण्यास किमान एक वर्ष लागणार आहे. त्यामुळे पुढील चार महिन्यांत ४३० खाटांचे रुग्णालय कमला नेहरू रुग्णालयात उभारले जाईल. नायडू रुग्णालयाच्या जागेत महाविद्यालयाची इमारत उभारली जात असली तरी तेथे अतिक्रमण झाल्याने अडचणी आहेत. त्या ठिकाणी २८० खाटांचे रुग्णालय उभारले जाणार आहे.

९८० जणांच्या भरतीस मान्यता
वैद्यकीय महाविद्यालय सुरू करताना त्यासाठी मनुष्यबळ असणे आवश्‍यक आहे. त्यासाठी ९८० जणांच्या भरतीला गुरुवारी मान्यता दिली आहे. तसेच सध्याचे कंत्राटी डॉक्टर, नर्स, तंत्रज्ञ आदी कर्मचारी, अधिकाऱ्यांच्या कराराला मुदतवाढ दिली आहे. पुढील काही दिवसांत नव्याने पदभरती केली जाईल, असे नवलकिशोर राम यांनी सांगितले.

७०० कोटी रुपयांची मागणी
भारतरत्न अटलबिहारी वाजपेयी वैद्यकीय महाविद्यालय उभारण्याचे काम महापालिकेने सुरू केले आहे. यासाठी तीन विभागांत बांधकाम सुरू असून, त्याचे ९० टक्के काम पूर्ण झाले आहे. त्यासाठी ७०० कोटी रुपये खर्च येणार आहे. त्याची तरतूद महापालिकेने केली आहे. पण या वैद्यकीय महाविद्यालयासाठी रुग्णालय उभे करणे आवश्‍यक असून, त्यासाठी ७०० कोटी रुपयांचा खर्च येणार आहे. यासाठीचा निधी महापालिकेकडे उपलब्ध नसल्याने यासाठी राज्य सरकारकडे मागणी केली जाणार आहे, असे आयुक्तांनी सांगितले.