आरटीओ निरीक्षकांच्या बदल्या ‘ऑफलाईन’ करण्याचा घाट मुख्यमंत्र्यांच्या पारदर्शकतेला परिवहन विभागाकडून हरताळ

पुणे, ता. १७ ः राज्याच्या मोटार वाहन विभागातील ३३१ सहायक मोटार वाहन निरीक्षकांची पदोन्नती होणार आहे. बदली प्रक्रियेत पारदर्शकता राहण्यासाठी मुख्यमंत्री देवेंद्र फडणवीस हे आग्रही असताना, परिवहन विभागातील काही बडे अधिकारी मात्र ‘ऑफलाईन’ पद्धतीने पदोन्नती प्रक्रिया राबविण्याचा घाट घालण्याच्या तयारीत आहेत. बदल्यांसाठी ऑनलाइन धोरण ठरलेले असताना अचानक परिवहन आयुक्त कार्यालयातील वरिष्ठ अधिकाऱ्यांच्या सूचनेवरून ‘ऑफलाईन’ पद्धतीने पदोन्नती दिली जाणार असल्याचे वरिष्ठ अधिकाऱ्याने नाव न छापण्याच्या अटीवर सांगितले.
परिवहन विभागातील ३३१ सहायक मोटार वाहन निरीक्षक यांची मोटार वाहन निरीक्षक म्हणून पदोन्नती होणार आहे. परिवहन आयुक्तालयाने बदल्यांसाठी २०२३ पासून ऑनलाइन प्रणाली राबवण्यास सुरवात केली. तीन महिन्यांपूर्वी परिवहन विभागाने १९९ मोटार वाहन निरीक्षकांची ‘ऑनलाईन’ पद्धतीने बदली व पदोन्नती दिली आहे. आता मात्र ‘आर्थिक हित’ डोळ्यासमोर ठेवून ऑफलाईन पद्धतीने पदोन्नती व बदल्या केल्या जाणार असल्याची माहिती आहे.
----------
आयुक्तांच्या भूमिकेकडे लक्ष
मोटार वाहन निरीक्षकांच्या बदल्यांसाठी ‘ऑनलाइन’ प्रक्रियेसाठी परिवहन आयुक्त विवेक भिमनवार यांनी आग्रह धरला. त्या बद्दल काहींनी नाराजी व्यक्त केल्यानंतर देखील आयुक्त आपल्या भूमिकेवर ठाम राहिले. आता मात्र त्यांच्याच कार्यालयातील काही बडे अधिकारी ऑफलाईन ही यंत्रणा राबविण्यासाठी प्रयत्न करीत आहेत. तेव्हा आयुक्त त्यांच्या दबावाला बळी पडतात की पारदर्शक कारभाराच्या बाजूने उभे राहत ऑनलाईन प्रक्रियेची बाजू घेतात हे पहावे लागणार आहे.
-----------------