पुढील तीन दिवस हवामान राहणार स्थिर

पुणे, ता. १८ : गेल्या काही दिवसांपासून शहर आणि परिसरात पावसाने विश्रांती घेतली आहे. त्यामुळे कमाल तापमानात किंचित वाढ झाली होती. मात्र, शनिवारी कमाल तापमानात किंचित घट होणार असून, त्यानंतर पुढील तीन ते चार दिवसांत हवामानात कोणताही बदल होणार नाही. कमाल तापमान स्थिर राहणार असल्याची शक्यता भारतीय हवामानशास्त्र विभागाने वर्तविली आहे.
शहरातील उपनगर परिसरात गुरुवारी कमाल तापमान ३३ अंश सेल्सिअसपर्यंत नोंदविण्यात आले होते. मात्र, शुक्रवारी (ता. १८) कमाल तापमानात किंचित घट झाली असून, कमाल तापमान २९ अंश सेल्सिअस तर किमान तापमान २२.८ अंश सेल्सिअस नोंदविण्यात आले. शहरात शुक्रवारी दिवसभर ढगाळ वातावरण होते. त्यामुळे उकाड्यात देखील वाढ झाली होती. पुढील काही दिवसांत कमाल तापमानात आणखी घट होणार असून, कमाल तापमान २७ अंश सेल्सिअसपर्यंत नोंदविण्यात येणार आहे. अति हलक्या ते हलक्या स्वरूपाचा पाऊस पडण्याची शक्यता हवामानशास्त्र विभागाने वर्तविली आहे.
पुणे आणि परिसरात शनिवारी (ता. १९) कमाल तापमानात किंचित घट होणार असून, कमाल तापमान २९ अंश सेल्सिअस इतके, तर किमान तापमान २३ अंश सेल्सिअस नोंदविण्यात येणार आहे. आकाश अंशतः ढगाळ राहणार असून अति हलक्या ते हलक्या स्वरूपाचा पाऊस पडण्याची शक्यता आहे. तर रविवारी (ता. २०) कमाल तापमान स्थिर राहणार असल्याची शक्यता आहे. कमाल तापमान २९ अंश सेल्सिअस पर्यंत नोंदविण्यात येणार असून, आकाश अंशतः ढगाळ राहून अति हलक्या ते हलक्या स्वरूपाचा पाऊस पडण्याची शक्यता हवामानशास्त्र विभागाने वर्तविली आहे.
-----------