पीएमपीच्या अध्यक्षांचा ‘प्रवास’ वर्षभराचाच गेल्या पाच वर्षात सात अध्यक्षांची बदली, दीपा मुंडे यांची बदली

पुणे, ता. १८ ः पीएमपीच्या अध्यक्षपदी पंकज देवरे यांची नियुक्ती करण्यात आली असून, ते सोमवारी पदभार स्वीकारणार आहेत. तर मावळत्या अध्यक्षा दीपा मुधोळ-मुंडे यांची नियुक्ती समाज कल्याण विभागाच्या आयुक्तपदी करण्यात आली. त्यांनी शुक्रवारी आपला पीएमपीचा पदभार सोडला. पुण्यातील सार्वजनिक वाहतुकीचा कणा असणाऱ्या पीएमपीच्या याही अध्यक्षांचा ‘प्रवास’ हा वर्षभराचाच राहिला. दीपा मुधोळ-मुंडे यांनादेखील अवघे एक वर्ष चार दिवसांनी पीएमपीचे ‘स्टिअरिंग’ सोडावे लागले. मागील पाच वर्षांत पीएमपीच्या सात अधिकाऱ्यांची बदली झाली आहे.
पीएमपीची रचना, कार्यपद्धती, प्रवाशांचे प्रश्न समजून घेण्यातच अध्यक्षांचे काही महिने जावे लागतात. दीपा मुधोळ- मुंडे यांनी आता कुठे कामाचा धडाका लावला होता, तेवढ्यात त्यांची बदली करून पीएमपीच्या कामांच्या गतीला पुन्हा एकदा ‘ब्रेक’ लागला आहे. गेल्या पाच वर्षांत पीएमपीच्या सात अध्यक्षांची बदली झाली आहे. या सर्वांचा परिणाम पीएमपीच्या कार्यशैलीवर होत आहे. असेच सुरू राहिले तर पीएमपीचा ‘प्रवास’ सक्षमीकरणाच्या दिशेने कसा होणार आहे, याबद्दल प्रवासी चिंता व्यक्त करीत आहेत. राज्य सरकारच्या सामान्य प्रशासनाने पीएमपीच्या अध्यक्षा दीपा मुधोळ-मुंडे यांची समाज कल्याण विभागाच्या आयुक्तपदी बदली केली. हा आदेश गुरुवारी काढला. त्यांच्या जागी पंकज देवरे यांच्या नियुक्तीचा आदेश काढला आहे. पंकज देवरे हे यापूर्वी लातूर जिल्ह्यात अतिरिक्त जिल्हाधिकारी व जातपडताळणी समितीचे अध्यक्ष म्हणून कार्यरत होते. त्यांना पदोन्नती देण्यात आली असून, ते सोमवारी पीएमपीच्या अध्यक्षपदाचा कार्यभार स्वीकारणार आहेत.
-----------------
असा झाला अध्यक्षांचा ‘प्रवास’ :
अधिकारी कार्यकाळ
- डॉ. राजेंद्र जगताप : २४ जुलै २०२० ते ३० जून २०२१
- डॉ. कुणाल खेमणार : ३० जून २०२१ ते १३ जुलै २०२१
- लक्ष्मीनारायण मिश्रा : १३ जुलै २०२१ ते १४ ऑक्टोबर २०२२
- ओम प्रकाश बकोरिया : १४ ऑक्टोबर २०२२ ते ६ जुलै २०२३
- सचिंद्र प्रताप सिंह : ६ जुलै २०२३ ते २३ ऑक्टोबर २०२३
- डॉ. संजय कोलते : २३ ऑक्टोबर २०२३ ते १३ जुलै २०२४
- दीपा मुधोळ-मुंडे : १३ जुलै २०२४ ते १७ जुलै २०२५
------------------------