सायबर चोरट्यांकडून पावणेचार लाखांचा गंडा

पुणे, ता. १७ ः बॅंकेच्या क्रेडिट कार्ड विभागातील कर्मचारी असल्याचे भासवून सायबर चोरट्यांनी ऑनलाइन माध्यमातून तब्बल पावणेचार लाख रुपयांची फसवणूक केली. ही घटना १७ जून रोजी घडली. याप्रकरणी ३४ वर्षीय तरुणाने विश्रामबाग पोलिस ठाण्यात फिर्याद दाखल केली. त्यावरून अनोळखी मोबाईल धारकाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी तरुण विश्रामबाग पोलिस ठाण्याच्या हद्दीत राहतात. १७ जूनला सायबर चोरट्यांनी फिर्यादीच्या मोबाईलवर संपर्क साधला. बॅंकेच्या क्रेडिट कार्ड विभागातून बोलत असल्याची बतावणी करत फिर्यादीचा विश्वास संपादित केला. त्यानंतर मोबाईलवर लिंक पाठवून फिर्यादीस ओटीपी शेअर केला. त्यानंतर सायबर चोरट्यांनी तरुणाच्या बॅक खात्यातून ३ लाख ८३ हजार रुपये वर्ग करून त्यांची फसवणूक केली. या प्रकरणाचा तपास पोलिस निरीक्षक अरुण घोडके करीत आहेत.

बसप्रवासात महिलेच्या दागिन्यांची चोरी
पुणे ः पीएमपीएल बसमधून प्रवास करणाऱ्या महिलेकडील ४६ हजार रुपये किमतीचे दागिने चोरट्यांनी चोरून नेले. ही घटना गुरुवारी (ता. १७) दुपारी दोन वाजता कोंढवा बुद्रुक येथील संत गाडगे महाराज शाळा ते सोमजी चौक या दरम्यान घडली. याप्रकरणी ५५ वर्षीय महिलेने कोंढवा पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी महिला या कोंढव्यात राहतात. गुरुवारी दुपारी दोन वाजता त्या कोंढव्यातील संत गाडगे महाराज शाळा ते सोमजी चौक या दरम्यान प्रवास करत होती. त्यावेळी बसमधील गर्दीचा फायदा घेत चोरट्यांनी महिलेकडील ४६ हजार रुपये किमतीचे दागिने चोरून नेले. हा प्रकार महिलेच्या निदर्शनास आल्यानंतर त्यांनी कोंढवा पोलिस ठाण्यात फिर्याद दाखल केली.

येरवड्यात महिलेकडील ६७ हजारांचा ऐवज लंपास
पुणे ः रिक्षातून खाली उतरून खासगी ट्रॅव्हल बसची वाट पाहणाऱ्या दांपत्याकडील ६७ हजार रुपयांचा ऐवज चोरून नेला. ही घटना मंगळवारी (ता. १५) सायंकाळी साडेसात वाजता येरवडा येथील गुंजन चौकात घडली. याप्रकरणी जळगावमधील तरुणाने येरवडा पोलिस ठाण्यात फिर्याद दाखल केली आहे. पोलिसांनी दिलेल्या माहितीनुसार, फिर्यादी तरुण व त्यांची पत्नी हे मूळचे जळगाव येथील आहे. मंगळवारी सांयकाळी गावी जाण्यासाठी ते येरवड्यातील गुंजन चौकात ट्रॅव्हल बसची वाट पाहत थांबले होते. त्यावेळी रिक्षातून आलेल्या चोरट्याने तरुणाच्या पत्नीची पर्स चोरून नेली. दोन हजारांची रोकड, सोन्या-चांदीचे दागिने, मोबाईल असा ६७ हजार रुपयांचा ऐवज चोरून नेला. याप्रकरणी पोलिसांकडून सीसीटीव्ही फुटेजच्या माध्यमातून चोरट्यांचा माग काढण्यात येत आहे.