गट-गणाच्या प्रारूप रचनेवर ५५ हरकती दाखल

पुणे, ता. १८ : पुणे जिल्हा परिषद आणि पंचायती समितीसाठी जाहीर करण्यात आलेल्या प्रारूप गट-गण रचनेवर आतापर्यंत ५५ हरकती दाखल झाल्या आहेत. त्यामध्ये सर्वाधिक म्हणजे २६ हरकती या खेडमधून तर त्या खालोखाल २१ हरकती हवेलीमधून दाखल झाल्या आहेत. दरम्यान, शनिवार आणि रविवारी या सुट्टीच्या दिवशी नागरिकांना हरकती दाखल करता येणार आहे.
पुणे जिल्हा परिषद आणि पंचायत समित्यांच्या निवडणुकीसाठी ७३ गट आणि १४६ गणांची रचनेचा प्रारूप आराखडा पाच दिवसांपूर्वीच प्रसिद्ध करण्यात आला आहे. जिल्हा प्रशासनाकडून हरकती सूचना मागविण्याची प्रक्रिया सुरू करण्यात आली. हरकती नोंदविण्यासाठी येत्या सोमवारपर्यंत (ता.२१) अंतिम मुदत आहे. आजपर्यंत या रचनेवर ५५ हरकती दाखल झाल्या आहेत.
जिल्ह्यातील सहा तालुक्यातूनच गट-गण रचनेवर हरकती दाखल झाल्या आहेत. मुळशी, जुन्नर, आंबेगाव, भोर, बारामती, दौंड आणि पुरंदर या सात तालुक्यातून एकही हरकती जिल्हा प्रशासनाकडे आलेल्या नाहीत.

तालुकानिहाय हरकती पुढीलप्रमाणे
शिरूर तालुक्यातून २ हरकती, मावळ मधून १, राजगड तालुक्यातून १, इंदापूरमधून ४, हवेलीमधून २१ आणि खेड मधून २६ हरकती जिल्हा प्रशासनाकडे आल्या आहेत, अशी माहिती जिल्हाधिकारी कार्यालयाकडून देण्यात आली.

सोमवारपर्यंत मुदत
हरकत दाखल करण्याची मुदत सोमवारी संपुष्टात येत आहे. मुदत संपल्यानंतर दाखल हरकतींवर जिल्हा प्रशासनाकडून तहसीलदारांकडून २८ जुलैपर्यंत अभिप्राय मागविला जाणार आहे. या अभिप्रायासह हरकतींचा अहवाल प्रशासनाकडून विभागीय आयुक्तांना सादर केला जाणार आहे. तर विभागीय आयुक्तांकडून ११ ऑगस्टपासून सुनावणी घेण्यात येणार आहे, असेही प्रशासनाकडून सांगण्यात आले.