कॅब चालकांचे आंदोलन स्थगित

पुणे, ता. १९ ः पुण्यात ऑनलाइन सेवा देणाऱ्या कॅब व रिक्षा चालकांचे आंदोलन शनिवारी स्थगित करण्यात आले. शुक्रवारी परिवहन विभागाचे अधिकारी यांच्याशी चर्चा झाली. मात्र, त्यावर तोडगा निघाला नाही. त्यामुळे हे आंदोलन मंगळवारपर्यंत सुरु राहणार असल्याचे सांगण्यात आले होते. शनिवारी मात्र आंदोलन स्थगित करीत असल्याचे भारतीय गिग कामगार संघटनेचे अध्यक्ष डॉ. केशव क्षीरसागर यांनी सांगितले.
पुणे, नागपूर व मुंबईच्या भागात काही प्रमाणात कॅब व रिक्षा चालकांच्या संपाचा परिणाम झाला. शुक्रवारी पुणे विमानतळ परिसरात याचा सर्वात जास्त परिणाम आढळून आला. डॉ. केशव क्षीरसागर यांनी या संदर्भात परिवहन मंत्री प्रताप सरनाईक यांच्याशी चर्चा केली. मात्र, त्यावर तोडगा न निघाल्याने संप आणखी तीव्र होण्याची शक्यता होती. शनिवारी मात्र संप स्थगित करीत असल्याचे जाहीर करीत सरकारला निर्णय घेण्यासाठी मंगळवारपर्यतची मुदत दिली आहे. मागण्या मान्य न झाल्यास बुधवारपासून पुन्हा आंदोलन करणार असल्याचे क्षीरसागर यांनी सांगितले.
कॅब आणि रिक्षा चालकांच्या अचानक संपामुळे प्रवाशांना मोठ्या अडचणींना सामोरे जावे लागले. विशेषतः पुणे विमानतळ, रेल्वे स्थानक, आणि आयटी पार्क परिसरात प्रवाशांची चांगलीच त्रेधातिरपीट उडाली होती. आंदोलन स्थगित झाल्याने प्रवाशांना काही अंशी दिलासा मिळाला आहे.

‘‘शुक्रवारी उबेर व ओला सेवा जवळपास बंदच होत्या. आंदोलन स्थगित झाल्याने त्या पूर्ववत होणार याचा आनंद आहे. कॅब चालकांनी आपल्या मागण्यासाठी प्रवाशांना वेठीस धरणे योग्य नाही.
श्रद्धा कुलकर्णी, प्रवासी
----------
‘‘मला पत्नीला घेऊन रुग्णालयात जायचे होते. शुक्रवारी संपामुळे काही रिक्षा चालकांनी व कॅब चालकांनी प्रवासाचे भाडे खूप वाढवले होते. त्यामुळे मला जास्तीची रक्कम देऊन प्रवास करावा लागला. अशा वेळी सार्वजनिक वाहतूक सेवा अधिक सक्षमपणे सर्व सामान्य प्रवाशांच्या पाठीशी उभारली पाहिजे. पीएमपीने जास्त बसगाड्या सोडणे अपेक्षित होते.
अनिल पाटील, प्रवासी