अवयवदात्यांच्या ७० कुटुंबीयांचा सन्मान

पुणे, ता. २१ ः अवयवांचे दान करून दुसऱ्यांच्‍या आयुष्‍याची दोरी बळकट करणाऱ्या कुटुंबीयांच्या प्रती कृतज्ञता म्‍हणून पुण्‍याच्‍या विभागीय अवयव प्रत्‍यारोपण समन्‍वय समितीतर्फे (झेडटीसीसी) रविवारी (ता. २०) रोजी बारावा ‘नमन दिवस’ भावनिक वातावरणात साजरा करण्यात आला. हा विशेष दिवस अवयवदान करणाऱ्या आत्म्यांना श्रद्धांजली वाहण्यासाठी आणि त्यांच्या अमूल्य योगदानाचे स्मरण करण्यासाठी आयोजित केला जातो.
यावर्षी ७० अवयवदात्यांच्या कुटुंबीयांना कर्नल भूषण ओक आणि रेडिओ जॉकी शोनाली यांनी सन्मानित केले. या कार्यक्रमात ‘झेडटीसीसी’चे सर्व अधिकारी, वैद्यकीय तज्ज्ञ, प्रत्यारोपण समन्वयक आणि अनेक अवयव प्रत्‍यारोपित झालेले लाभार्थी उपस्थित होते. एकत्र येऊन त्यांनी कृतज्ञतेची भावना व्यक्त केली आणि एक सशक्त समाज घडवण्यासाठी एकजुटीचा संदेश दिला. ‘झेडटीसीसी’ दरवर्षी हा ‘नमन दिवस’ साजरा करत समाजात अवयवदानाविषयी जागरूकता वाढवण्याचा आणि दात्यांच्या योगदानाचे स्मरण ठेवण्याचा प्रयत्न करते.