गणपतराव पाटील यांना ‘पर्यावरण जीवनगौरव’ जी. डी. यादव यांना ‘पर्यावरणभूषण’ पुरस्कार

पुणे, ता. २१ : एनव्हायर्न्मेंटल क्लब ऑफ इंडिया आणि महाराष्ट्र राज्य प्रदूषण नियंत्रण मंडळातर्फे पर्यावरणाच्या क्षेत्रात उल्लेखनीय कामगिरी करणाऱ्या व्यक्तींना दिले जाणारे पुरस्कार जाहीर झाले आहेत. श्री दत्त शेतकरी सहकारी साखर कारखान्याचे अध्यक्ष अप्पासाहेब ऊर्फ गणपतराव पाटील यांना यंदाचा ‘पर्यावरण जीवनगौरव’ पुरस्कार, तर हरित हायड्रोजन, परिपत्रक अर्थव्यवस्था, कार्बन डाय-ऑक्साइड मूल्यांकन या विषयांवर मोलाचे मूलभूत संशोधन केलेले पद्मश्री प्रा. डॉ. जी. डी. यादव यांना ‘पर्यावरणभूषण’ पुरस्कार देण्यात येणार आहे.
हा कार्यक्रम शुक्रवारी (ता. २५) सकाळी अकरा वाजता भांडारकर प्राच्य विद्या संस्था येथील फिरोदिया सभागृह येथे होणार आहे. कार्यक्रमाला प्रमुख पाहुणे म्हणून महाराष्ट्र प्रदूषण नियंत्रण मंडळाचे अध्यक्ष सिद्धेश कदम, विश्वेश्वर सहकारी बँकेचे उपाध्यक्ष राजेंद्र मिरजे आदी उपस्थित राहणार आहेत, अशी माहिती क्लबचे अध्यक्ष आमोद घमंडे, सचिव गणेश शिरोडे आणि खजिनदार सचिन पाटील यांनी पत्रकार परिषदेत दिली.
‘पर्यावरण गौरव’ पुरस्कारार्थींमध्ये डॉ. बालमुकुंद पालीवाल, राजेश जैन, प्रसाद घळसासी, प्रदीपसिंह पाटील, डॉ. राजेश मणेरीकर, आनंद चोरडिया, ज्योती पानसे, अमर जाधव, ऋषिकेश कुलकर्णी, विलो इंडिया मॅथर एंड प्लांट आणि किर्लोस्कर न्यूमॅटिक कंपनी यांचा समावेश आहे.
---------- ---------