लम्पीमुळे आठ जनावरांचा मृत्यू

पुणे, ता. २१ : जिल्ह्यात लम्पी त्वचारोगाचा प्रादुर्भाव वाढला आहे. यंदा साथ सुरू झाल्यापासून ५७८ जनावरांना लम्पीची लागण झाली असून, त्यापैकी आठ जनावरांचा मृत्यू झाला आहे. शिरूर तालुक्यात प्रादुर्भाव वाढला असून, शिरूरमध्येच २१३ जनावरांना लम्पीची लागण झाली आहे.
लम्पी चर्मरोग हा गोवंशीय वर्गात होणारा विषाणूजन्य रोग आहे. रोगाचा प्रादुर्भाव प्रामुख्याने गाई, बैल आणि वासरांमध्ये आढळून येतो. शेळ्या आणि मेंढ्यांना या रोगाची बाधा होत नाही. जिल्ह्यात शिरूरनंतर सर्वाधिक पुरंदर तालुक्यातील जनावरांना या रोगाची बाधा झाली आहे. शिरूरमधील तीन, मुळशीमधील दोन, आंबेगाव, खेड आणि पुरंदर तालुक्यातील प्रत्येकी एका जनावराचा मृत्यू झाला आहे. आत्तापर्यंत ४२८ जनावरे बरे झाले आहेत तर सध्या १४२ जनावरांवर उपचार सुरू आहेत. आंबेगाव तालुक्यात सर्वाधिक ४१, तर जुन्नरमध्ये ४० जनावरांवर उपचार सुरू आहेत. सध्या जिल्ह्यामध्ये सहा फिरत्या पशुचिकित्सा पथकाद्वारे पशुपालकांच्या दारात उपचार करण्यात येत असल्याचे पशुसंवर्धन विभागाने सांगितले.

ही आहेत लक्षणे...
गाभण जनावरांमध्ये गर्भपात होऊ शकतो. जनावरांचे दूध उत्पादन घटते. या आजारामध्ये जनावरांना ताप येणे, डोळ्यांतून तसेच नाकातून स्राव होणे, भूक मंदावणे ही लक्षणे सुरुवातीला दिसतात. नंतर जनावराच्या अंगावर विशेष करून डोके, मान, कास, पोटाकडील भाग आदी ठिकाणी १ ते ५ सेंटिमीटर व्यासाच्या गाठी येतात.

ही काळजी घ्यावी...
- निरोगी जनावरांना बाधित जनावरांपासून वेगळे बांधावे.
- गायी व म्हशींना एकत्रित ठेवू नये.
- बाधित गावांमध्ये बाधित जनावरांच्या पिण्याच्या पाण्याची स्वतंत्र व्यवस्था करावी.
- बाधित परिसरात स्वच्छता व निर्जंतुकीकरण करावे.

जिल्ह्यात सहा लाख ५० हजार ९९१ जनावरांचे लसीकरण केले आहे. तसेच ज्या ठिकाणी रोगाचा उद्रेक दिसून येत आहे आणि ज्या पशुधनास लसीकरण झालेले नाही त्यासाठी तालुकानिहाय लस मागणी घेण्यात आली आहे. नव्याने लसमात्रा खरेदी करून पुरवठा करण्याचे नियोजन केले आहे. सध्या काही प्रमाणात लम्पी चर्म रोगाचा प्रादुर्भाव सौम्य दिसून येत असून उपचारानंतर बहुतांश जनावरे बरी होत आहेत.
- डॉ. अंकुश परिहार,
जिल्हा पशुसंवर्धन उपायुक्त