ससूनमध्‍ये रुग्णसेवा विस्‍कळित परिचारिका संपाचा फटका; नियोजित शस्त्रक्रिया लांबणीवर

पुणे, ता. २१ ः विविध मागण्‍यांसाठी महाराष्ट्र राज्य परिचारिका संघटनेच्यावतीने गुरुवारपासून संप पुकारण्यात आला आहे. या संपात सुमारे ३४० परिचारिका सहभागी झाल्या असल्‍याने रुग्‍णसेवा विस्‍कळित झाली आहे. त्यामुळे कान- नाक- घसा, अस्थिरोग, मेंदूविकार, डोळे यावरील तातडीच्‍या वगळता नियोजित शस्त्रक्रिया पुढे ढकलल्या आहेत. त्यामुळे रुग्णांची गैरसोय होत आहे. दरम्‍यान, यावर उपाय म्‍हणून ससून प्रशासनाने खासगी वैद्यकीय महाविद्यालयांकडून परिचारिकांची मागणी केली आहे.
सातव्या वेतन आयोगातील वेतनत्रुटी आणि कंत्राटी भरतीच्या निषेधार्थ महाराष्ट्र राज्य परिचारिका संघटनेने राज्यव्यापी आंदोलन सुरु केले आहे. यामध्ये ससून रुग्णालयातील ९३९ परिचारिकांपैकी ३४० म्हणजे जवळपास निम्म्या परिचारिका कामावर नाहीत. त्यामुळे बाह्यरुग्ण आणि आंतररुग्ण विभागातील उपचारांवरही परिणाम झाला आहे. वेळेवर तपासण्यासाठी घेऊन न जाणे, जेवण मिळण्यात उशीर होणे, शस्त्रक्रियांची तारीख पुढे देणे, त्‍यामध्‍ये रुग्‍णांचा ससूनमध्ये वाढलेला मुक्काम अशा अनेक तक्रारी रुग्ण आणि नातेवाईकांकडून प्रशासनाकडे केल्या जात आहेत.
ससून प्रशासनाकडून यावर तोडगा म्‍हणून बीएसस्‍सीच्‍या नर्सिंग महाविद्यालयात शिकणाऱ्या १३० प्रशिक्षणार्थी परिचारिकांना रुग्णसेवेसाठी रुजू केले आहे. याशिवाय, भारती हॉस्पिटल, डी. वाय. पाटील मेडिकल कॉलेज आणि सिंबायोसिस वैद्यकीय महाविद्यालय यांच्‍या अधिष्ठाता आणि प्रमुखांना मनुष्यबळ पुरविण्याबाबत विचारणा करण्यात आली आहे. तेथील विद्यार्थी ससूनमध्ये रुजू झाल्यास रुग्णसेवा सुरळीत राहू शकेल, असे रुग्णालय प्रशासनाचे म्हणणे आहे.
--------------
‘‘ससून रुग्णालयातील ४० टक्के परिचारिका संपावर गेल्या असून, रुग्णसेवेवर परिणाम होऊ नये, यासाठी अतिरिक्‍त मनुष्यबळ येथे रुजू केले जात आहे. ससूनमधील बीएस्सी नर्सिंगचे विद्यार्थी तसेच इतर महाविद्यालयातील मनुष्यबळ मिळावे, यासाठी संपर्क केला आहे. आपत्कालीन रुग्‍णांवर उपचार आणि शस्त्रक्रिया या नियमितप्रमाणे होत आहेत.
- डॉ. यल्लपा जाधव, वैद्यकीय अधीक्षक, ससून रुग्णालय
-----------------

तारीख - बाह्यरुग्ण विभाग - आंतररुग्ण विभाग

१६ जुलै - १७६८ - ९८५
१७ जुलै - १४५५ - ९४४
१८ जुलै - १३०९ - ९४६
१९ जुलै - ८४० - ८१३
२१ जुलै - १४६८ - ९०३
..........