हडपसर आणि खडकवासलातील मतांची पडताळणी होणार सर्वोच्च न्यायालयाचे आदेश ः २५ जुलै ते २ आॅगस्ट दरम्यान कार्यवाही

पुणे, ता. २१ ः सर्वोच्च न्यायालयाने दिलेल्या आदेशानुसार हडपसर व खडकवासला विधानसभा निवडणुकीतील मतमोजणीच्या २९ यंत्रांमधील मतांची पडताळणी २५ जुलै ते २ ऑगस्ट या कालावधीत होणार आहे. केवळ कंट्रोल युनिटमधील मतांची अंतिम आकडेवारी संबंधित उमेदवाराला दाखविण्यात येणार आहे. त्यानंतर नव्याने १ हजार ४०० मते टाकून व्हीव्हीपॅट यंत्रातील चिठ्ठ्यांची मोजणी करण्यात येणार असल्याची माहिती उपजिल्हा निवडणूक अधिकारी मीनल कळसकर यांनी दिली.
हडपसर मतदारसंघातील मतमोजणीत अनियमितता झाल्याच्या कारणावरून राष्ट्रवादी कॉंग्रेस शरदचंद्र पवार पक्षाचे प्रशांत जगताप आणि खडकवासला मतदारसंघातील याच पक्षाच्या सचिन दोडके यांनी ही याचिका न्यायालयात दाखल केली होती. विधानसभा निवडणुकीचा निकाल लागल्यानंतर जिल्ह्यातील ११ मतदारसंघांमधील महाविकास आघाडीच्या ११ पराभूत उमेदवारांनी मतदान यंत्राच्या तपासणीसाठी जिल्हा निवडणूक शाखेकडे अर्ज केले होते. हडपसर व खडकवासला मतदारसंघातील उमेदवार प्रशांत जगताप व सचिन दोडके यांनी सर्वोच्च न्यायालयात दाद मागितली होती.
उमेदवारांच्या याचिका दाखल झाल्यानंतर त्या मतदारसंघातील यंत्रांमधील मतांचा डेटा अद्याप ठेवण्यात आला आहे. न्यायालयाचे आदेश तसेच केंद्रीय निवडणूक आयोगाच्या निर्देशांनंतर मतांच्या पडताळणीसाठी हे वेळापत्रक ठरविण्यात आले आहे. त्यात हडपसरसाठी २७ तर खडकवासलासाठी २ यंत्रांची पडताळणी केली जाणार आहे. त्यानुसार २५ जुलैला हडपसर व खडकवासल्यातील प्रत्येकी दोन यंत्रांची पडताळणी केली जाईल. त्यानंतर १ ऑगस्टपर्यंत हडपसरच्या प्रत्येकी ४ व २ ऑगस्ट रोजी एका यंत्राची पडताळणी केली जाईल. यात उमेदवाराने निवडलेल्या प्रत्येक कंट्रोल युनिटमधील प्रत्यक्ष मतमोजणीवेळी प्रत्येक उमेदवाराला पडलेली मते दाखविली जातील. त्यानंतर त्या कंट्रोल युनिटमधील माहिती खोडून मतदान यंत्रावर १ हजार ४०० मते टाकून, त्याच्या व्हीव्हीपॅट यंत्रांमधील चिठ्ठ्यांची मोजणी केली जाईल. यासाठी चार हॉल ठेवण्यात येणार असून, आक्षेप घेतलेला उमेदवार किंवा त्यांचा प्रतिनिधी या वेळी उपस्थित राहू शकणार आहे, असे जिल्हा प्रशासनाकडून सांगण्यात आले.
-------------
‘‘सर्वोच्च न्यायालयात हडपसर विधानसभा मतदार संघाच्या मतमोजणी प्रक्रियेबाबत आक्षेप नोंदवत, पुन्हा मतमोजणी करण्याची मागणी केली होती. या प्रकरणात न्यायालयाने दिलेल्या निकालातील आदेशानुसार हडपसर विधानसभा मतदारसंघातील मतांची पुन्हा मोजणी होणार आहे. त्यामुळे मतांची झालेली चोरी आता जगासमोर येणार आहे.
- प्रशांत जगताप, याचिकाकर्ते उमेदवार, हडपसर मतदारसंघ