समाविष्ट १६ गावांचा एसटीपी प्रस्ताव मंजूर

पुणे, ता. २२ : महापालिकेत समाविष्ट झालेल्या २३ पैकी १६ गावांच्या मैलापाणी शुद्धीकरण केंद्रांसाठीचा (एसटीपी) प्रस्ताव राज्य सरकारने मंजूर केला आहे. १६ गावांच्या ‘एसटीपी’साठी ३३२ कोटी रुपयांचा प्रस्ताव आहे. केंद्र सरकारच्या अमृत २.० योजनेंतर्गत समाविष्ट गावांच्या एसटीपीचा प्रश्‍न मार्गी लावला जाणार आहे. त्यानुसार राज्य सरकारने मंजूर केलेला संबंधित प्रस्ताव आता केंद्र सरकारकडे पाठविला जाणार आहे.
महापालिका प्रशासनाकडून केंद्र आणि राज्य सरकारच्या मदतीने मैलापाणी शुद्धीकरण प्रकल्पांतर्गत शहरात ११ ठिकाणी ‘एसटीपी’ केंद्र उभारले जात आहेत. असे असताना महापालिकेत नव्याने समाविष्ट झालेल्या २३ गावांमध्ये अन्य सोई-सुविधांप्रमाणेच मलवाहिन्या, एसटीपी केंद्रांचा अभाव होता. त्यानुसार महापालिका प्रशासनाने २३ गावांसाठी मलनिःसारण प्रकल्प अहवाल तयार केला होता. यासाठी एक हजार ४३७ कोटी रुपये खर्च निश्‍चित केला होता. दरम्यान, केंद्राकडून ‘अमृत २.०’ योजना राबविली जात आहे. या अंतर्गत महापालिकेने मलवाहिनी प्रकल्पासाठी ३४२ कोटी रुपये व मैलापाणी शुद्धीकरण केंद्रासाठी १९० कोटी रुपये अशी ५३३ कोटी रुपयांची तरतूद केली होती.

अमृत २.० अंतर्गत २३ पैकी १६ गावांसाठी पहिल्या टप्प्यामध्ये दोन स्वतंत्र अहवाल तयार करण्यात आले. त्यास महाराष्ट्र जीवन प्राधिकरणाची मान्यता मिळाल्यानंतर प्रशासकीय मान्यतेसाठी हा अहवाल नगरविकास विभागाच्या प्रधान सचिव कार्यालयाकडे पाठविण्यात आला. संबंधित प्रकल्पाच्या अहवालाचे मंगळवारी नगरविकास विभागाचे प्रधान सचिव डॉ. के. एच. गोविंदराज यांच्या अध्यक्षतेखाली झालेल्या बैठकीत सादरीकरण करण्यात आले. त्यानुसार पहिल्या टप्प्यातील १६ गावांच्या मलवाहिन्यांच्या प्रकल्पासाठी ३३२ कोटी रुपयांच्या प्रकल्प अहवालास प्रशासकीय मान्यता देण्यात आली. याबाबतचा शासन निर्णय लवकरच काढण्यात येणार आहे.

१६ गावांमध्ये होणारी कामे
१८७ किलोमीटर
- मलवाहिन्यांचे जाळे

४५ किलोमीटर
- मुख्य मलवाहिन्या

३७ किलोमीटर
- मलवाहिन्या देखभाल-दुरुस्ती

नव्याने समाविष्ट झालेल्या २३ पैकी १६ गावांमधील मैलापाणी शुद्धीकरण केंद्रांसाठी (एसटीपी) राज्य सरकारला प्रस्ताव पाठविला होता. त्याला प्रशासकीय मान्यता मिळाली आहे. संबंधित प्रकल्प ३३२ कोटी रुपयांचा आहे. त्यामुळे १६ गावांमधील मलवाहिन्यांची कामे मार्गी लागू शकतील.
- नवलकिशोर राम, आयुक्त, महापालिका