रकमेबाबतचा पत्नीचा अर्ज फेटाळला
पुणे, ता. २३ ः जोडप्याचा २३ वर्षांचा संसार. पत्नी ऑस्ट्रेलियात वास्तव्यास. वैचारिक मतभेदातून दोघांमध्ये वाद झाले. त्यामुळे तिने घटस्फोटासाठी कौटुंबिक न्यायालयात दावा करण्याबरोबरच वेळोवेळी पतीला दिलेले ५६ लाख रुपये त्याच्याकडून परत मिळण्याची मागणी केली. पतीला रक्कम व्यवहारासाठी दिली की संसारासाठी, याचा कोणताही दाव्यात उल्लेख नसल्याने कौटुंबिक न्यायालयाने रक्कम परत करण्याचा अर्ज फेटाळत दोघांचा घटस्फोट मंजूर केला.
रमेश आणि सुजाता (नावे बदललेली) यांचा २००२ मध्ये प्रेमविवाह झाला. त्यांना १७ वर्षांचा मुलगा आहे. या जोडप्याचे पटेनासे झाल्यावर ते २०१५ पासून स्वतंत्र राहू लागले. त्यानंतर पत्नीने परस्पर संमतीने घटस्फोटासाठी अर्ज दाखल केला. सध्या स्मिता ऑस्ट्रेलियात नोकरी करत आहे. २०२० मध्ये पतीने तिला घर विकायला लावले आणि त्यातून आलेले ४२ लाख रुपये स्वतःकडे ठेवले. याव्यतिरिक्त पतीने पाच लाख रुपये घेतले. व्यवसाय करण्याच्या नावाखाली वेळोवेळी पैसे घेतल्याचे सुजाता यांच्या दाव्यात नमूद आहे. त्यामुळे घटस्फोटासाठी पतीला दिलेले ५६ लाख रुपये परत मिळावेत, असा अर्ज सुजाता यांनी केला होता. या दाव्यात पतीच्या वतीने ॲड. वैशाली चांदणे व ॲड. अमृता साखरे यांनी बाजू मांडली.
ॲड. चांदणे यांनी युक्तिवाद केला की, अर्जदार यांनी ती सदनिका ६५ लाख ७० हजार रुपयांना विकलेली आहे. ही रक्कम अर्जदार यांनाच मिळालेली आहे. पतीने दिलेले दहा लाख रुपये दोघांच्या सयुक्तिक खात्यात दिलेले आहेत. ते पैसे अर्जदार यांनी वारंवार काढलेले आहेत. उलट दहा लाखांची रक्कम अर्जदाराने पतीला द्यायला हवी आहे. त्यामुळे अर्जदार पत्नीने ५६ लाख रुपयांचा केलेला उल्लेख पूर्णपणे खोटा व बनावट आहे. त्यामुळे हा अर्ज न्यायालयाने फेटाळण्याची मागणी ॲड. चांदणे यांनी केली. न्यायालयाने दोन्ही पक्षांचा युक्तिवाद ऐकून घटस्फोट मंजूर करत ५६ लाख रुपये परत देण्याचा अर्ज फेटाळला.
अर्ज या न्यायालयात चालविता येणार नाही
रक्कम परत मिळण्याचा (रिइम्बर्समेंट) अर्ज या न्यायालयात चालविता येणार नाही. अर्जदार पत्नीने वसुलीसाठी विशिष्ट कार्यवाही कायद्यांतर्गत दिवाणी दावा दाखल केला पाहिजे. अर्जदार पत्नी यांनी सदनिका विकत घेताना पतीने दहा लाख रुपये दिले आहेत. ती सदनिका अर्जदार यांनी दरमहा १८ हजार रुपयांच्या भाडेतत्त्वावर दिली आहे. त्यामधील काहीही रक्कम पतीला मिळालेली नाही, असे ॲड. चांदणे यांनी नमूद केले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.