धनकवडीत १८ वाहनांची तोडफोड

पुणे, ता. २३ : धनकवडी परिसरात मंगळवारी मध्यरात्री टोळक्याने कोयते, दांडकी उगारून दहशत पसरवून १८ वाहनांची तोडफोड केली. त्यांना रोखण्याचा प्रयत्न करणाऱ्या दोन रहिवाशांवर टोळक्याने तीक्ष्ण शस्त्राने वार केले. शहर परिसरात आठवडाभरात वाहन तोडफोडीच्या तीन घटना घडल्या आहेत. हडपसरमधील रामटेकडी, भवानी पेठ, तसेच कोंढवा भागातही तोडफोडीच्या घटना घडल्या आहेत.

धनकवडीतील तोडफोडप्रकरणी सहकारनगर पोलिस ठाण्यात गुन्हा दाखल करण्यात आला आहे. फरारी तीन आरोपींचा शोध घेण्यात येत असल्याची माहिती सहकारनगर पोलिसांनी दिली. धनकवडीत मंगळवारी मध्यरात्री केशव कॉम्प्लेक्स, सरस्वती चौक, तसेच नवनाथनगर भागात टोळके आरडाओरडा करत दुचाकीवरून आले. टोळक्याने शिवीगाळ करून रिक्षा, तीन मोटारी, विद्यार्थी वाहतूक करणाऱ्या दोन व्हॅन व एका टेम्पोची तोडफोड केली. या घटनेची माहिती मिळताच सहकारनगर पोलिसांनी घटनास्थळी धाव घेतली. तोपर्यंत टोळके फरार झाले होते.
कोंढव्यात दोन दिवसांपूर्वी एका किराणा दुकानातील खाद्यपदार्थांची पाकिटे टोळक्याने फेकून दिली होती. दुकानासमोरील रिक्षाची काच फोडली होती. भवानी पेठेतील मंजुळाबाई चाळीत टोळक्याने वाहनांची तोडफोड केली होती. औंधमधील विधाते वस्ती परिसरात वाहनांची तोडफोड केली होती. सिंहगड रस्त्यावरील माणिकबागेतही टोळक्याने १५ वाहनांची तोडफोड केली होती.

टोळक्याने १८ वाहनांची तोडफोड केल्याचे समोर आले आहे. पोलिसांकडून आरोपींचा शोध घेण्यात येत आहे. अशा प्रकारच्या घटना रोखण्यासाठी गस्त वाढविण्याचे आदेश देण्यात आले आहेत.
- मिलिंद मोहिते,
पोलिस उपायुक्त, परिमंडळ दोन