युवा वाद्य पथकाचा वादनासाठी मॉरिशस दौरा

पुणे, ता. २३ : युवा वाद्य पथकातर्फे सुमारे पंधरा वर्षे वादनाच्या जोडीनेच पथकातील सदस्य वर्षभर अभिनव वाद्यपूजन, पुस्तक दहीहंडी, कृतज्ञता दीपावली, आपत्ती व्यवस्थापन अशा सामाजिक उपक्रमांमध्ये सहभागी होतात. यंदाच्या वर्षी शहरात आणि राज्याच्या विविध भागांत वादनासोबतच युवा वाद्य पथकातील वादक ‘ग्लोबल गणेशोत्सव’ या अभूतपूर्व संकल्पनेचा भाग म्हणून २२ ऑगस्ट ते १ सप्टेंबर या कालावधीत मॉरिशस येथे वादनासाठी जाणार आहेत.
मॉरिशसमधील बजरंग युवा मंच यांनी पथकाला ही संधी दिली आहे. संस्कृती आणि परंपरा यांची ओळख परदेशी नागरिकांना आणि विद्यार्थ्यांना व्हावी, हा ग्लोबल गणेशोत्सवाचा उद्देश आहे. तोच उद्देश सार्थ करण्यासाठी युवा वाद्यपथकातील पंधरा वादक मॉरिशसला जाणार आहेत. तेथे त्यांनी वादनाबरोबरच गणेशोत्सवात विविध कार्यक्रमांचे आयोजन केले आहे.