हडपसरची मतमोजणी पुन्हा लांबणीवर

पुणे, ता. २३ : सर्वोच्च न्यायालयाच्या आदेशानुसार आता केवळ खडकवासला विधानसभा निवडणुकीतील २ यंत्रांमधील मतांची पडताळणी होणार आहे. हडपसर विधानसभा मतदारसंघातील मतांची पडताळणी रद्द करण्यात आली आहे. याप्रकरणी याचिकाकर्ते उमेदवार प्रशांत जगताप यांनी उच्च न्यायालयात पुन्हा मतदान याचिका दाखल केल्याने निकालानंतरच ही पडताळणी केली जाण्याची शक्यता आहे.

विधानसभा निवडणुकीत हडपसर मतदारसंघातील राष्ट्रवादी काँग्रेस शरदचंद्र पवार पक्षाचे उमेदवार प्रशांत जगताप यांनी मतमोजणीत घोळ झाल्याचा आरोप करत उच्च न्यायालयात धाव घेतली होती. मात्र, न्यायालयाने ही याचिका फेटाळून लावली होती. त्यानंतर जगताप यांनी सर्वोच्च न्यायालयात धाव घेतली होती. त्यानंतर सर्वोच्च न्यायालयाने जगताप यांचे म्हणणे मान्य करत केंद्रीय निवडणूक आयोगाला मतांच्या पडताळणीचे आदेश दिले होते. त्यानुसार जिल्हा निवडणूक शाखेने २५ जुलै ते २ ऑगस्ट या कालावधीत हडपसर मतदारसंघातील जगताप यांनी निवडलेल्या २७ यंत्रामधील मतांची पडताळणी होणार होती.

दरम्यान, जगताप यांनी पुन्हा उच्च न्यायालयात पुनर्विचार याचिका दाखल केल्याचे जिल्हा निवडणूक शाखेला कळविले होते. त्यावर जिल्हा निवडणूक अधिकारी तथा जिल्हाधिकारी जितेंद्र डुडी यांनी राज्याच्या मुख्य निवडणूक अधिकारी एस. चोकलिंगम यांना पत्र पाठविले होते. तेव्हा चोकलिंगम यांनी ही पडताळणी रद्द करण्याचे निर्देश यंत्रांची तांत्रिक बाजू सांभाळणाऱ्या भारत इलेक्ट्रिकल कंपनीला दिले आहेत. त्यामुळे जगताप यांच्यासाठीची पडताळणी आता रद्द करण्यात आल्याचे अधिकाऱ्यांकडून सांगण्यात आले. आता केवळ खडकवासला मतदारसंघातील २ यंत्रांमधील मतांचीच २५ जुलै रोजी पडताळणी होणार असल्याचे या वेळी सांगण्यात आले.

-----------