अकरावी प्रवेशाचे वेळापत्रक आणले अलीकडे

पुणे, ता. २३ : राज्याच्या माध्यमिक व उच्च माध्यमिक शिक्षण विभागाने बुधवारी सायंकाळी इयत्ता अकरावीच्या तिसऱ्या नियमित फेरीचे सुधारित वेळापत्रक जाहीर केले आहे. त्यानुसार आता तिसऱ्या फेरीची गुणवत्ता व निवड यादी आणि महाविद्यालयांचा कट-ऑफ शुक्रवारी (ता. २५) जाहीर होणार असून निवड झालेल्या विद्यार्थ्यांना शुक्रवार आणि शनिवारी (ता. २६) महाविद्यालयात प्रत्यक्ष जाऊन प्रवेश निश्चित करावा लागणार आहे. अकरावीच्या प्रवेश प्रक्रियेला होणारा विलंब लक्षात घेता, शिक्षण विभागाने ही प्रवेशप्रक्रिया लवकर पूर्ण होण्यासाठी वेळापत्रक अलीकडे आणले आहे.
अकरावीच्या तिसऱ्या नियमित फेरीत १३ हजार ६२१ विद्यार्थ्यांनी प्रवेशासाठी नव्याने नोंदणी केली आहे. तर केंद्रीय प्रवेश प्रक्रियेंतर्गत चार लाख १० हजार ४९८ विद्यार्थ्यांनी अर्जाचा भाग दोन म्हणजेच कनिष्ठ महाविद्यालयांचा पसंतीक्रम नोंदविला आहे. अकरावी प्रवेशाच्या याआधीच्या वेळापत्रकाप्रमाणे तिसऱ्या नियमित फेरीची गुणवत्ता आणि निवड यादी शनिवारी (ता. २६) जाहीर होणार होती. त्यानुसार, निवड झालेल्या विद्यार्थ्यांना २६ ते २८ जुलैदरम्यान प्रवेश निश्चित करण्यासाठी कालावधी दिला होता. परंतु, आता या प्रवेश फेरीची गुणवत्ता आणि निवड यादी शुक्रवारी जाहीर होणार आहे.
संपूर्ण राज्यात शैक्षणिक वर्ष २०२५-२६ पासून अकरावीचे प्रवेश केंद्रीय ऑनलाइन पद्धतीने करण्यात येत आहेत. या प्रवेश प्रक्रियेत पहिल्या आणि दुसऱ्या नियमित फेरीत सात लाख २० हजार ६६६ विद्यार्थ्यांनी कनिष्ठ महाविद्यालयात आपला प्रवेश निश्चित केला आहे. तिसऱ्या नियमित फेरीसाठी विद्यार्थ्यांना कॅप आणि कोट्यांतर्गत (अल्पसंख्याक, संस्थांतर्गत आणि व्यवस्थापन) प्रवेशासाठी कनिष्ठ महाविद्यालयांचा पसंतीक्रम भरण्यासाठी मंगळवार ते बुधवारपर्यंतचा कालावधी दिला होता. यात १३ हजार ६२१ विद्यार्थ्यांनी बुधवारपर्यंत नव्याने नोंदणी केली आहे. ‘कॅप’अंतर्गत प्रवेशासाठी चार लाख १० हजार ४९८ विद्यार्थ्यांनी महाविद्यालयांचा पसंतीक्रम दिलेला आहे. तर कोट्याअंतर्गत प्रवेशासाठी ८२ हजार ९५२ विद्यार्थ्यांनी महाविद्यालयांचा पसंतीक्रम नोंदविला आहे.

इयत्ता अकरावीच्या प्रवेश प्रक्रियेचे वेळापत्रक अलीकडे आणून ही प्रवेशप्रक्रिया लवकर पूर्ण करण्यासाठी आणि अकरावीचे शैक्षणिक वर्ष लवकर सुरू व्हावे, यासाठी हा प्रयत्न करण्यात येत आहे. यापुढील प्रवेश फेऱ्यांच्या वेळापत्रकातही त्याप्रमाणे बदल करण्यात येणार आहेत.
- डॉ. महेश पालकर,
संचालक, माध्यमिक व उच्च माध्यमिक शिक्षण विभाग