घराच्या बदल्यात घराची मागणी - महापालिकेच्या सर्वेक्षणात माहिती समोर

पुणे, ता. २३ : गंज पेठेतील महात्मा जोतिराव फुले वाडा आणि क्रांतिज्योती सावित्रीबाई फुले यांचे स्मारक एकत्रित करताना अनेक नागरिकांची घरे ताब्यात घ्यावी लागणार आहेत. या नागरिकांना मोबदला देण्यासाठी केलेल्या सर्वेक्षणात ८५ टक्के नागरिकांनी घराच्या बदल्यात घराची मागणी केली आहे.
फुले वाडा आणि सावित्रीबाई फुले स्मारक यादरम्यान सुमारे दीडशे मीटरचे अंतर आहे. ही दोन्ही स्मारके एकत्रित करण्याचा निर्णय राज्य सरकारने घेतला आहे. त्यासाठी महापालिकेला या परिसराचे सर्वेक्षण करून भूसंपादनाची प्रक्रिया सुरू करावी, असे आदेश दिले होते. या स्मारकासाठी एकूण १० हजार ९४२ चौरस मीटरची जागा आवश्‍यक आहे. या ठिकाणी जुनी घरे, वाडे आहेत. यामध्ये ३५८ जागामालक, ६२४ भाडेकरू, सुमारे २५ झोपड्या आहेत. या जागेचे भूसंपादन केल्यास सुमारे ९८२ नागरिक बाधित होणार आहेत. या नागरिकांकडून घराची जागा ताब्यात घेतल्यास त्यांना मोबदला म्हणून रोख रक्कम, टीडीआर, एफएसआय किंवा घर यापैकी काय हवे याबाबत महापालिकेने सर्वेक्षण केले होते. त्यात ८५ टक्के जागा मालकांनी घराच्या बदल्यात घर द्यावे, अशी मागणी केली आहे. यामध्ये घरमालकांसह भाडेकरूंनीही घराची मागणी केली आहे.

भुजबळ करणार भिडे वाड्याची पाहणी
शिवाजी रस्त्यावरील बुधवार पेठेतील भिडे वाड्याच्या ठिकाणी देशातील पहिली मुलींची शाळा सुरू झाली होती. या ठिकाणी पुणे महापालिकेतर्फे स्मारक उभे केले जात आहे. या कामाची अन्न व नागरी पुरवठामंत्री छगन भुजबळ हे उद्या (ता.२४) सकाळी नऊ वाजता पाहणी करणार आहेत. त्यानंतर फुले वाडा आणि क्रांतिज्योती सावित्रीबाई फुले स्मारक या ठिकाणीही पाहणी करून अधिकाऱ्यांशी चर्चा करणार आहेत, अशी माहिती अधिकाऱ्यांनी दिली.