बालकुमार संस्थेच्या पुरस्कारांची घोषणा

पुणे, ता. २३ : अखिल भारतीय मराठी बालकुमार साहित्य संस्था, पुणेतर्फे देण्यात येणाऱ्या विविध राज्यस्तरीय साहित्य पुरस्कारांची घोषणा बुधवारी करण्यात आली. २०२४ या वर्षासाठी बालसाहित्यातील नऊ विभागांत पुरस्कार जाहीर केल्याची माहिती संस्थेचे अध्यक्ष माधव राजगुरू व कार्याध्यक्ष अनिल कुलकर्णी यांनी दिली.
कल्पना मलये, रवींद्र जवादे, रमेश वंसकर, प्रमोद धायगुडे, डॉ. विठ्ठल जाधव, राजेंद्र झुंजारराव आणि विजयकुमार चित्तरवाड या लेखकांच्या पुस्तकांना विविध विभागांतील पुरस्कार जाहीर झाले आहेत. दिवाळी अंक- आनंद मासिक हा पुरस्कार ‘छावा’ दिवाळी अंकाला आणि बालसाहित्य प्रकाशनासाठी दिला जाणारा पुरस्कार नंदिनी प्रकाशनाला जाहीर झाला आहे. पुरस्काराचे वितरण २ ऑगस्टला सकाळी १०.३० वाजता शिवाजीनगर येथील मॉर्डन महाविद्यालयाच्या लता मंगेशकर सभागृहात होणाऱ्या कार्यक्रमात ज्येष्ठ साहित्यिक लक्ष्मीकांत देशमुख व ग्रंथ प्रसारक प्रसाद भडसावळे यांच्या हस्ते होणार आहे.
संस्थेतर्फे राज्यभरातील विद्यार्थ्यांसाठी अभिनव वाचन उपक्रम घेण्यात आला होता. यात सर्वाधिक पुस्तके वाचणाऱ्या विद्यार्थ्यांचा, तसेच विद्यार्थ्यांना प्रोत्साहन देणाऱ्या शिक्षकांचा गौरव या कार्यक्रमात केला जाणार आहे.