जमिनी वाटपाची माहिती सादर करा

पुणे, ता. २३ : शासकीय जमिनीच्या वाटपाचे रेकॉर्ड अद्ययावत करण्याच्या सूचना देऊनही त्याची अंमलबजावणी तहसीलदार यांच्याकडून होत नसल्याचे समोर आले आहे. त्यामुळे आता राज्य सरकारने पुढाकार घेत ही माहिती संकलित करून तातडीने संकेतस्थळावर अपलोड करावी, असे आदेश तहसीलदारांना दिले आहेत.

केंद्राच्या नियंत्रक व महालेखापरीक्षकांनी २०१८-१९ मध्ये तयार केलेल्या सामान्य व सामाजिक क्षेत्रातील अहवालात शासकीय जमिनीच्या वाटपाची माहिती सार्वजनिक करण्याची शिफारस केली होती. यानुसार, राज्यातील सर्व जिल्ह्यांना महसूल विभागाचे अवर सचिव संजय जाधव यांनी पत्र पाठवून संबंधित माहिती अद्ययावत करण्याच्या सूचना दिल्या होत्या. त्यापूर्वी राज्य शासनाने २०१२ मध्ये जमिनीच्या वाटपासंबंधीचे सर्व शासकीय आदेश व परिपत्रके संकेतस्थळावर प्रसिद्ध करणे बंधनकारक केले होते, तर लोकलेखा समितीनेदेखील जमिनीच्या वाटपामध्ये पारदर्शकता यावी, यासाठी ही माहिती तातडीने सार्वजनिक संकेतस्थळावर प्रसिद्ध करण्याची सूचना केली होती.

पुणे जिल्ह्याची त्याबाबतची माहिती अद्याप प्रसिद्ध झालेली नाही, असे निदर्शनास आले आहे. याची दखल घेत अवर सचिव संजय जाधव यांनी पुन्हा एकदा पत्र पाठवून संबंधित अधिकाऱ्यांचे लक्ष वेधले आहे, तर मुंबई शहर आणि नागपूर जिल्ह्यांनी आपली माहिती अद्ययावत करून प्रसिद्ध केली होती.