सरकार टिकविण्यासाठीच कोकाटेंवर कारवाई नाही

पुणे, ता. २३ : ‘‘कृषिमंत्री माणिकराव कोकाटे यांच्या राजीनाम्याची मागणी शेतकरी संघटना व राजकीय पक्षांकडून होत आहे. तरीही ते स्वतः पत्रकार परिषद घेऊन राजीनामा देणार नसल्याचे सांगतात. मुख्यमंत्री व उपमुख्यमंत्र्यांचा त्यांच्याच मंत्र्यांवर वचक राहिला नाही. ते सरकार टिकवण्यासाठी हतबल असून, मंत्रिमंडळातील बेताल वर्तनाकडे डोळेझाक करीत आहेत,’’ अशा शब्दांत शशिकांत शिंदे यांनी सरकारवर घणाघात केला.
राष्ट्रवादी कॉंग्रेस शरदचंद्र पवार पक्षाच्या प्रदेशाध्यक्षपदी निवड झाल्यानंतर शिंदे बुधवारी पहिल्यांदाच पुण्यात आले होते. मार्केट यार्ड येथील निसर्ग मंगल कार्यालयात प्रमुख पदाधिकाऱ्यांच्या बैठकीत त्यांनी पक्ष वाढीसाठी चर्चा केली. या वेळी पक्षाचे शहराध्यक्ष प्रशांत जगताप यांच्यासह पक्षाचे नेते, पदाधिकारी उपस्थित होते.
शिंदे म्हणाले, ‘‘सरकारकडे पैसे नाहीत, असे कोकाटे यांचे म्हणणे चुकीचे नाही. सरकारने दोन महिन्यांपूर्वी अंदाजपत्रक सादर केले, त्यानंतर आता ५६ हजार कोटी रुपयांचे पुरवणी अंदाजपत्रक सादर करावे लागणे म्हणजे सरकार कर्जबाजारी झाले आहे. तरीही, शेतकऱ्यांची कर्जमाफी करण्याऐवजी वेगवेगळ्या योजनांना सरकार पैसे देत आहे. मंत्र्यांच्या वक्तव्यानंतर त्यांचे फक्त खाते बदलायचे, असा नवा पायंडा पडत आहे.’’

हिंदी भाषा लादण्याचा प्रयत्न
राज्यपालांनी मराठी भाषेबाबत केलेले वक्तव्य व राज्य सरकारच्या हिंदी भाषेच्या आग्रहाबाबत शिंदे म्हणाले, ‘‘राज्यपालांनी उद्योजक महाराष्ट्रात कसे येतील? असे म्हटले आहे. मुळात भाषेवर उद्योजक येत नाहीत. सरकारकडून दिल्या जाणाऱ्या सवलती व प्रोत्साहनामुळे उद्योग-व्यवसाय येत असतात. भाषेशी उद्योगधंद्याचा काही संबंध नाही. राज्य सरकार हिंदी भाषा लादण्याचा प्रयत्न करत आहे.’’

शशिकांत शिंदे म्हणाले....
- लाडकी बहीण योजना बंद करणार नाहीत, पण जास्तीत जास्त नियम लावून भगिनींना दूर ठेवतील
- मी पक्ष वाढीबाबत चर्चा करण्यासाठी आलो आहे, पक्ष विलीनीकरणाची चर्चा नाही
- विरोधी पक्षनेता सरकार निवडत नाही, महाविकास आघाडी म्हणून निर्णय होईल
- महादेव मुंडे प्रकरणात निःपक्षपातीपणे चौकशी करावी