गुडघा, खुबा प्रतिरोपण अगदी मोफत ! कमला नेहरू रुग्णालयात महात्मा फुले जन आरोग्य योजनेतून उपचार
पुणे, ता. २५ : वयोमान वाढल्यावर गुडघ्याच्या तसेच खुब्याच्या सांध्यांची झीज होते. त्यामुळे वेदना होतात व चालताना त्रासही होतो. त्याला प्रतिरोपण शस्त्रक्रिया हा पर्याय आहे. मात्र, या शस्त्रक्रियेसाठी खासगी रुग्णालयात लाखो रुपयांचा खर्च येतो. परंतु, महापालिकेच्या मंगळवार पेठेतील कमला नेहरू रुग्णालयात या शस्त्रक्रिया महात्मा फुले जनआरोग्य योजनेच्या माध्यमातून मोफत होत आहेत. त्यामुळे सर्वसामान्यांना दिलासा मिळाला आहे. गेल्या दोन महिन्यांपासून येथे २५ हून अधिक प्रतिरोपण शस्त्रक्रिया झाल्या आहेत.
सध्याच्या बदललेल्या जीवनशैलीमुळे गुडघ्याची झीज होत आहे. तसेच खुबाही खराब होतो. वास्तविक आधी हे आजार साठीनंतर डोके वर काढायचे. मात्र आता ते २० वर्षांच्या तरुणांनादेखील सतावू लागले आहेत. खास करून कोरोनानंतर हे प्रमाण तरुण पिढीमध्येही वाढत आहे. कमला नेहरू रुग्णालयात यापूर्वी या शस्त्रक्रिया व्हायच्या. मात्र, प्रतिरोपण करताना गुडघ्यात किंवा खुब्यात टाकावा लागणारा कृत्रिम सांधा हा बाहेरून विकत घ्यावा लागायचा. मात्र, आता येथे महात्मा फुले जनआरोग्य योजना सुरू झाल्याने तो सांधा मोफत मिळत असल्याने पूर्ण शस्त्रक्रिया विनाशुल्क होत आहे. गरजू रुग्णांसाठी ही मोठी दिलासा देणारी बाब ठरत आहे. कृत्रिम सांध्यांचा, औषधांचा व उपचारांचा संपूर्ण खर्च महात्मा फुले जनआरोग्य योजनेकडून केला जातो.
रुग्णालयातील अस्थिरोग विभागातील शल्यविशारद डॉ. मंदार नागमोडे यांच्या नेतृत्वाखाली तज्ज्ञ डॉक्टरांची टीम हे प्रतिरोपण करत आहे. प्रत्यक्षात ६५ वर्षांपेक्षा अधिक वयाचे, सांधेदुखीने त्रस्त, चालण्यास अडचण असलेले अनेक रुग्ण येथे दाखल झाले असून, त्यांच्या शस्त्रक्रिया यशस्वी ठरल्या आहेत. खासगी रुग्णालयांत लाखोंचा खर्च टाळून महापालिकेच्या कमला नेहरू रुग्णालयात मोफत व दर्जेदार उपचाराची ही संधी आहे. इतकेच नव्हे तर आयुष्यमान भारत योजनाही येथे लागू आहे, अशी माहिती रुग्णालयाचे वैद्यकीय अधीक्षक डॉ. प्रशांत बोथे यांनी दिली.
..............
‘‘आमच्याकडे आठवड्यातून एक ते दोन गुडघा प्रतिरोपण शस्त्रक्रिया, तर दोन ते तीन खुबा प्रतिरोपण शस्त्रक्रिया महात्मा फुले जनआरोग्य योजनेतून मोफत होतात. यामध्ये अगदी २० वर्षांच्या तरुणांपासून ८० वर्षांच्या ज्येष्ठ नागरिकांवर शस्त्रक्रिया झाल्या आहेत. काही रुग्णांच्या तर खुबा व गुडघा या दोन्ही शस्त्रक्रिया झालेल्या आहेत. यासाठी आधार कार्ड व रेशन कार्ड लागते. या शस्त्रक्रियेदरम्यान गुडघा किंवा खुब्यामध्ये बसविलेले कृत्रिम सांधे हे १० ते १५ वर्षांपर्यंत टिकतात.
– डॉ. मंदार नागमोडे, अस्थिशल्य विशारद, कमला नेहरू रुग्णालय
.................
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.