पुणे विमानतळावर दहा कोटींचा गांजा जप्त

पुणे, ता. २६ ः बॅंकॉकहून पुण्यात आलेल्या प्रवाशाने रासायनिक प्रक्रिया केलेल्या गांजाची (हायड्रोपोनिक गांजा) तस्करी केल्याप्रकरणी केंद्रीय सीमाशुल्क विभागाच्या पथकाने प्रवाशास अटक केली. पोलिसांनी त्याच्याकडून दहा किलो रासायनिक गांजा जप्त केला. त्यास न्यायालयीन कोठडी देण्यात आली आहे.
अभिनय अमरनाथ यादव असे अटक केलेल्या प्रवाशाचे नाव आहे. त्याच्याविरुद्ध अमली पदार्थ प्रतिबंधक कायद्यान्वये गुन्हा दाखल करण्यात आला आहे. अभिनय यादव हा २४ जुलै रोजी बॅंकॉंकहून पुणे आंतरराष्ट्रीय विमानतळावर उतरला होता. तो गडबडीत विमानतळातून बाहेर पडण्याचा प्रयत्न करत होता. सीमाशुल्क विभागाच्या पथकाने त्याच्या संशयास्पद हालचाली टिपल्या. संशयावरून त्यास ताब्यात घेतले. त्याच्याकडील बॅगेची तपासणी केल्यानंतर बॅगेत रासायनिक प्रक्रिया केलेला गांजा आढळून आला. आंतरराष्ट्रीय बाजारात संबंधित अमली पदार्थाची किंमत दहा कोटी पाच लाख इतकी आहे. दरम्यान, त्यास न्यायालयात हजर करण्यात आले. न्यायालयाने त्यास न्यायालयीन कोठडीत ठेवण्याचे आदेश दिले. यादवने गांजा कोणाकडून आणला, तसेच तो पुण्यात कोणाला गांजा विक्री करणार होता, याचा तपास पथकाकडून सुरू आहे.
--------------------------------