महिलेसह सहाय्यक आयुक्तांना कचरा संकलनावरून मारहाण कोंढवा येथील घटना ः एका कुटुंबाविरूद्ध गुन्हा

पुणे, ता. २६ ः कचरा संकलन करण्यास येणाऱ्या स्वच्छ संस्थेच्या महिला कर्मचाऱ्यास घरातील कचरा उचलण्याच्या कारणावरून एका कुटुंबाने मारहाण केली. या घटनेत कोंढवा येवलेवाडी क्षेत्रीय कार्यालयाच्या सहाय्यक आयुक्तांनाही मारहाण झाल्याचा धक्कादायक प्रकार उघडकीस आला आहे. ही घटना गुरुवारी (ता. २४) सकाळी कोंढवा येथील साईनगर परिसरात घडली.
कचरावेचक महिला उषा किशोर शिंदे व सहाय्यक आयुक्त राजेंद्र कादमाने यांना या प्रकरणात मारहाण झाली. याप्रकरणी कोंढवा पोलिस ठाण्यात एका कुटुंबाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, उषा शिंदे या गेल्या पंधरा वर्षांपासून कोंढवा येवलेवाडीतील साईनगर वॉर्डामध्ये (गल्ली क्रमांक १३) नियमितपणे कचरा संकलन करतात. साईनगर परिसरातील एक कुटुंब काही दिवसांपासून घरगुती कचऱ्यासाठी दरमहा आकारले जाणारे ९० रुपये शुल्क देण्याचे टाळण्यासाठी कचरा कचरावेचकांना न देता थेट कात्रज येथील पुलाखाली फेकत असल्याचे महापालिकेच्या कर्मचाऱ्यांच्या निदर्शनास आले होते. दरम्यान, गुरुवारी संबंधित कुटुंब व वॉर्ड अधिकाऱ्यांमध्ये शाब्दिक वाद झाला. त्यावेळी संबंधित कुटुंबाने कादमाने यांना धक्काबुक्की केली. त्यावेळी शिंदे यांनी मध्यस्थी करून शांतता निर्माण करण्याचा प्रयत्न केला. तेव्हा संबंधित कुटुंबाने त्यांनाही मारहाण केली. या घटनेत हातातील काचेच्या बांगड्या तुटल्याने त्या जखमी झाल्या.
----------