निखिल सहानी, ऋतुजा माळवदकर प्रथम खडतर परिस्थितीतही ‘केटूएस अ‍ॅडव्हेंचर रेस’ची यशस्वी सांगता

पुणे, ता. २६ : मुसळधार पावसाच्या सरी आणि २१ किलोमीटर लांब १३ डोंगरांची परीक्षा, अशा खडतर परिस्थितीतही ‘केटूएस मॉन्सून अ‍ॅडव्हेंचर रेस २.०’ स्पर्धेची शनिवारी सिंहगडच्या शिखरावर यशस्वी सांगता झाली. या स्पर्धेत निखिल सहानी यांनी नवीन विक्रमसह पुरुष विभागात, तर ऋतुजा माळवदकर यांनी महिला गटात प्रथम क्रमांक पटकावीत चमकदार कामगिरी बजावली.
‘लाइफफिट अरेना’ यांच्यातर्फे या स्पर्धेचे आयोजन करण्यात आले होते. तर ‘बांदल कन्स्ट्रक्शन’ हे मुख्य प्रायोजक आणि ‘सकाळ माध्यम समूह’ माध्यम प्रायोजक होते. कात्रज घाटातून या रोमांचकारी स्पर्धेला सुरवात झाली. सिंहगडच्या शिखरावर संपणाऱ्या या स्पर्धेत पुण्यासह राज्यभरातून आलेल्या ४०० हून अधिक धावपटूंनी भाग घेतला. विशेष म्हणजे, हवामानाच्या प्रतिकूल परिस्थितीतही कोणताही अपघात न होता सर्व धावपटूंनी सुरक्षितरीत्या अंतिम रेषा ओलांडली.
स्पर्धेच्या सर्वसाधारण पुरुष गटात निखिल सहानी यांनी पहिला क्रमांक तर नीलेश कुलाये आणि करण भोये यांनी दुसरा आणि तिसरा क्रमांक पटकाविला. तसेच सर्वसाधारण महिला गटात ऋतुजा माळवदकर यांनी पहिला, स्नेहल योगिता यांनी दुसरा तर अर्पिता कुटे यांनी तिसरा क्रमांक पटकाविला. ३६ ते ४५ पुरुष गटात पहिला योगेश सानप यांनी, दुसरा विशाल गोखे, आणि तिसरा क्रमांक काशिनाथ कटारे यांनी पटकविला तर ३६ ते ४५ महिला गटात अलमस मुलाणी, श्रीमा बाळिगा आणि माया पांडे यांनी अनुक्रमे पहिला, दुसरा आणि तिसरा क्रमांक मिळविला. ४६ वर्षे व अधिक पुरुष गटात पहिला क्रमांक सिद्धेश मेनकुदळे, दुसरा कृष्णा पॉल आणि तिसरा क्रमांक खांडू बाचुटे यांनी मिळविला तर ४६ वर्षे व अधिक महिला गटात पहिला, दुसरा आणि तिसरा क्रमांक अनुक्रमे रेणू कौर सिधू, दीपा मिंठबाकर आणि नेहा जोगळेकर यांनी पटकाविला.
-----------------
फोटोः 34828