छंद जोपासून आयुष्य समृद्ध करा : पोतदार

पुणे, ता. २७ : ‘वाढत्या वयातही जीवन आनंददायी ठेवायचे असेल तर ज्येष्ठांनी आपला एखादा आवडता छंद जोपासायला हवा,’ असे मत ग्रामीण कथाकार बबन पोतदार यांनी व्यक्त केले. कोथरूड ज्येष्ठ नागरिक संघाच्या मासिक कार्यक्रमात ‘वाचन संस्कृती’ या विषयावर ते बोलत होते.
पोतदार म्हणाले, ‘‘नियमित वाचन, लेखन, व्यायाम, फेरफटका अशा गोष्टी सहज शक्य असतात, फक्त मनाचा निग्रह हवा. आज ग्रामीण भागातही ज्येष्ठ नागरिक संघ सक्रिय आहेत. कोथरूड ज्येष्ठ नागरिक संघ दरमहा दोन कार्यक्रम आयोजित करत असल्याने ज्येष्ठांसाठी ही पर्वणीच आहे.’’ या व्याख्यानानंतर पोतदार यांनी मुंबई विद्यापीठाच्या अभ्यासक्रमात समाविष्ट असलेली त्यांची ग्रामीण कथा ‘पकूमावशी’ साभिनय सादर केली. अध्यक्षस्थानी दिलीप खंडकर होते. नामदेव कुरे यांनी सूत्रसंचालन केले, तर विजयकुमार चित्रे यांनी आभार मानले.
-----------