आरटीओमुळे वाचले तीन जणांचे प्राण

पुणे, ता. २८ : खेडशिवापूरजवळील शिंदेवाडी परिसरात नुकत्याच झालेल्या दुचाकी अपघातात तीन जण जखमी झाले. यात दोन महिला व एक पुरुषाचा समावेश होता. यावेळी महामार्गावर गस्त घालणाऱ्या पुणे प्रादेशिक परिवहन कार्यालयाच्या (आरटीओ) ‘वायुवेग पथक क्रमांक ३’ च्या मोटार वाहन निरीक्षकांनी अपघातग्रस्तांना तत्काळ रुग्णालयात दाखल केले. त्यांना वेळेत व योग्य उपचार मिळाल्याने जखमींचे प्राण वाचले आहेत. मोटार वाहन निरीक्षक समीर शिरोडकर, सहाय्यक निरीक्षक श्वेता नर्खेडकर आणि चालक महादेव महाले हे गस्त घालत होते. त्यावेळी त्यांना दुचाकीच्या अपघातात तीन जण जखमी अवस्थेत आढळले. या वेळी समीर शिरोडकर व पथकाने त्यांना तत्काळ रुग्णालयात दाखल केले. त्यामुळे जखमींना वेळेवर वैद्यकीय मदत उपलब्ध झाली.